اسلام آباد /بیجنگ (این این آئی)گزشتہ 5 برسوں میں چین میں پاکستانی طالب علموں کی تعداد 5 ہزارسے بڑھ کر22 ہزارسے تجاوز کرگئی ہے جبکہ تعلیمی سال 2018-19ء کیلئے چین کی حکومت، یونیورسٹیوں، مقامی حکومتوں اورکمپنیوں نے ایک ہزارسے زائد پاکستانی طالب علموں کو وظائف جاری کر دیئے ۔
ذرائع کے مطابق اس وقت چین کی یونیورسٹیوں اورتعلیمی اداروں میں 22 ہزارسے زیادہ پاکستانی طالب علم تعلیم حاصل کررہے ہیں، چین میں غیرملکی طالب علموں کے حوالے سے پاکستان سرفہرست ہے اورپاکستانی طالب علم چینی تاریخ، ثقافت، طب، انفارمیشن ٹیکنالوجی، ماحولیاتی سائنسز، چینی زبان اوربین الاقوامی اقتصادیات اورتجارت کی تعلیم حاصل کررہے ہیں۔گزشتہ سال کے دوران چین نے 7 ہزارپاکستانی طالب علموں کیلئے وظائف جاری کئے۔چین کے سینئرحکومتی اہلکار نے بتایا کہ یہ طالب علم اپنے خاندان اورملک کیلئے باعث فخر ہیں، چین میں قیام کے دوران ان پاکستانیوں کو گھر سے دوری کازیادہ احساس نہیں ہوتا کیونکہ چین کی حکومت اورسماج پاکستانی طالب علموں کیلئے خیرسگالی اورگرم جوشی پرمبنی رویہ رکھتے ہیں۔انہوں نے کہاکہ اوورسیز سٹڈیز کیلئے چین پاکستانی طالب علموں کیلئے مقبول ترین ملک ہے اورگزشتہ 5 برسوں میں چین میں پاکستانی طالب علموں کی تعداد 5 ہزارسے بڑھ کر22 ہزارسے تجاوز کرگئی ہے۔انہوں نے کہاکہ دیگر ایشیائی ممالک کے مقابلے میں چین پاکستانی طالب علموں کیلئے زیادہ وظائف فراہم کررہاہے۔
