اسلام آباد(نیوز ڈیسک) وزیراعظم محمد نوازشریف نے کہا ہے کہ سانحہ کراچی کے ملزمان کو جلد گرفتار کرکے قرار واقعی سزا دی جائے گی ، پاکستان افغانستان سمیت پورے خطے میں دہشتگردی کا خاتمہ چاہتا ہے ،ضرب عضب میں بھرپور کامیابی ملی ہے ۔ ان خیالات کا اظہار وزیراعظم نے اسلام آباد میں چھوٹے کاشتکاروں کیلئے قرضہ سکیم کی تقریب سے خطاب کرتے ہوئے کیا ۔ انہوں نے کہا کہ مسلم لیگ (ن) کے منشور میں زراعت کی ترقی کیلئے جامع حکمت عملی مرتب کی گئی ہے ۔ انہوں نے کہا کہ جب ہم نے اقتدار سنبھالا تو زرمبادلہ کے ذخائر تسلی بخش نہیں تھے ، امن وامان کا مسئلہ سنگین تھا ، توانائی کا فقدان تھا ۔ مسلم لیگ (ن) نے ان تمام چیلنجز کا سامنا کرکے روپے کی قدر کو مستحکم اور افراط زر کی شرح میں کمی کی ہے ۔ وزیراعظم نے کہا کہ ملک میں لائیو سٹاک کی ترقی کیلئے کام کیاجائے گا چھوٹے کاشتکاروں کو ترقی کا موقع ملے گا زراعت کو مکمل صنعت کا درجہ دیاجائے گا اس سے چھوٹے کاشتکاروں کو فائدہ ہوگا انہیں جدید ٹیکنالوجی تحقیق سے آگاہ کیاجائے گا ۔ انہوں نے کہا کہ کاشتکاروں کی ترقی سے پاکستان کی صنعت بہتر ہوجائے گی ۔ وزیراعظم نے کہا کہ حکومت نوجوانوں کو خود کفیل اور ترقی کی راہ پرگامزن کرنے کیلئے اقدامات کررہی ہے ۔مزدوروں کی بنیادی تنخواہوں میں اضافہ کیا گیا ۔ انہوں نے کہا کہ پاکستان اور افغانستان سمیت پورے خطے سے دہشتگردی کا خاتمہ ہونا چاہیے ہماری حکومت نے ملک میں معاشی ترقی اور امن وامان کے حوالے سے سنجیدہ اقدامات کئے ہیں ۔ توانائی بحران کیلئے اربوں روپے مختص کئے گئے ہیں حکومت نے قومی ترقی کے پروگرام کیلئے آئندہ بجٹ میں اڑھائی سو ارب روپے مختص کئے ہیں ۔ وزیراعظم نے کراچی واقعہ کی سخت مذمت کرتے ہوئے کہا کہ اسماعیلی برادری محب وطن ہے حکومت کو کمزور کرنے کے تمام عزائم ناکام ہوگئے ۔ انہوں نے کہا کہ پاک چین اقتصادری راہداری منصوبہ کسی کو ہضم نہیں ہورہا ہے پاکستان کے اندر باہر بعض قوتیں نہیں چاہتیں کہ پاکستان ترقی کرکے خوشحال ملک بن جائے ۔