لاہور (مانیٹرنگ ڈیسک) معروف صحافی حسن نثار نے ایک نجی ٹی وی چینل کے پروگرام میں کہا کہ بیگم کلثوم نواز کی بیماری پر سوال اٹھانے والوں سے معذرت کی باتیں کیوں کی جا رہی ہیں، انہوں نے کہا کہ ہماری سیاست خود غرض بھی ہے اور جمہوریت کم ظرف بھی ہے جبکہ خود شریف خاندان بھی ایسا ہی ہے۔ جب پروگرام میں معروف صحافی حسن نثار سے سوال کیا گیا کہ بیگم کلثوم نواز طویل علالت کے بعد وفات پا گئی ہیں اور

کیا اب کلثوم نواز کی بیماری پر سوال اٹھانے والوں کو شریف خاندان سے معافی مانگنی چاہیے؟ اب کا جواب دیتے ہوئے انہوں نے کہا کہ ہماری سیاست خودغرض بھی ہے اور جمہوریت انتہائی کم ظرف بھی ہے، سینئر صحافی نے کہا کہ ہمارے بزرگ کہہ گئے ہیں کہ دشمن مرے تے خوشی نہ کرئیے، سجناں وی مر جاناں مگر ہم تو معاملات کو دشمنی سے بھی آگے لے جاتے ہیں۔ گفتگو کے دوران انہوں نے کہا کہ ایک بات بالکل مت بھولیں کہ یہ لوگ خود بھی ایسے ہی ہیں، انہوں نے کہا کہ ابھی چند ماہ پہلے میری والدہ کی وفات ہوئی تو پاکستان کا کوئی ایسا شخص نہیں تھا جس نے تعزیت کا اظہار نہ کیا ہو، معروف صحافی نے کہا کہ عمران خان تو کیا آصف زرداری نے بھی تعزیت کی اور میں ان کے حوالے سے جو لکھتا رہا ہوں، مجھے شرم بھی آئی لیکن شریف خاندان واحد خاندان تھا جن میں سے صرف ایک بندے کو اتنی تمیز تھی کہ اس نے تعزیت کی۔ انہوں نے بتایا کہ شریف خاندان سے تعزیت کے لیے آنے والا واحد شخص حمزہ شہباز تھا، انہوں نے کہا کہ ایسا کرنا ادب و آداب میں شامل ہوتا ہے حالانکہ ان کی تعزیت سے میری والدہ نے واپس نہیں آ جانا تھا، انہوں نے کہا کہ میری دعا ہے کہ اللہ پاک بیگم کلثوم نواز کو غریق رحمت کریں اور ان کے خاندان کو صبر جمیل دیں۔