اسلام آباد (مانیٹرنگ ڈیسک )سابق خاتون اول بیگم کلثوم نواز کے انتقال کی خبر جہاں پوری پاکستانی قوم کو غمزدہ کر چکی ہے وہیں شریف خاندا ن کے سخت ترین مخالفین بھی بیگم کلثوم نواز کی وفات پر غمزدہ ہیں اور شریف خاندان سے اس انتہائی دکھ کی گھڑی میں تعزیت کر رہے ہیں ۔ ایسے میں عوامی مسلم لیگ کے سربراہ اور وفاقی وزیر ریلوے شیخ رشید احمد نے بھی بیگم کلثوم نواز کی
رحلت پر گہرے دکھ اور غم کا اظہار کیا ہے۔ سماجی رابطوں کی ویب سائٹ ٹویٹر پر اپنے تعزیتی پیغام میں شیخ رشید نے بیگم کلثوم نواز کے انتقال کی خبر شیئر کرتے ہوئے اپنے گہرے دکھ و غم کا اظہار کیا ہے۔ ان کا اپنے پیغام میں کہنا تھا کہ یہ نہایت افسوسناک خبر ہے، اللہ پاک مرحومہ کو جنت الفردوس میں جگہ عطا فرمائے۔ اس موقع پر شیخ رشید نے شریف خاندان سے بھی تعزیت کا اظہار کیا ہے۔
