لاہور(نیوز ڈیسک )صوبائی وزیر صنعت و تجارت میاں اسلم اقبال کی زیر صدارت سیکرٹریٹ میں محکمہ صنعت کا بریفنگ اجلاس منعقد ہواجس میں سالانہ ترازو پاسنگ فیس ختم کرنے کا فیصلہ کیا گیا۔ شیڈول میں ترمیم کے لئے مسودہ بل کابینہ کو بھجوایا جائے گا-کروڑوں روپے کی ترازو پاسنگ فیس ختم ہونے سے لاکھوں دکانداروں کو فائدہ ہوگا- اجلاس میں محکمہ صنعت کے تمام شعبوں
کو متحرک اور فعال کرنے اورتمام ضلعی پرائس کنٹرول کمیٹیوں کی تشکیل نو کرکے انہیں متحرک کرنے کا بھی فیصلہ کیا گیا۔صوبائی وزیر صنعت میاں اسلم اقبال نے اجلاس سے خطاب کرتے ہوئے کہا کہ ایک ہفتے کی مہلت ہے، اوزان و پیمائش کے پیمانے درست کرلئے جائیں -اوزان و پیمائش کے پیمانے چیک کرنے کے لئے اچانک چھاپے مارے جائیں گے- کسی سے زیادتی نہیں ہوگی لیکن عوام کا استحصال کرنے والوں کو کسی صورت نہیں چھوڑیں گے۔صوبائی وزیر نے ہدایت کی کہ اشیائے ضروریہ کی قیمتوں کی مانیٹرنگ کے نظام کو موثر بنایا جائے اورمیں خود اشیائے ضروریہ کی قیمتوں کی مانیٹرنگ کروں گا- ہمیں ٹیم ورک کے طور پر کام کرنا ہے اور نتائج دینا ہیں-جس نے کام نہیں کرنا وہ کہیں اور چلا جائے-عوام کی توقعات پر پورا اترنا ہے اور انہیں ریلیف کی فراہمی یقینی بنانا ہے-سیکرٹری صنعت ، ڈی جی صنعت اور متعلقہ حکام نے اجلاس میں شرکت کی جبکہ ڈی جی انڈسٹریز نے محکمہ صنعت کے مختلف شعبوں کے بارے میں تفصیلی بریفنگ دی۔صوبائی وزیر صنعت نے پنجاب سرمایہ کاری بورڈ کے اجلاس کی صدارت کرتے ہوئے بورڈ کی کارکردگی پر عدم اطمینان کا اظہار کرتے ہوئے کہا کہ سرمایہ کاری بورڈ کا بنیادی مقصد سرمایہ کاری کو فروغ دینا ہے لیکن بدقسمتی سے بورڈ کی گزشتہ9سالہ کارکردگی مایوس کن ہے۔ پنجاب میں سرمایہ کے مواقعوں سے
بھرپور فائدہ نہیں اٹھایا جاسکا -بورڈ کو کاغذی کارروائی کی بجائے سرمایہ کاری کے فروغ کے لئے عملی اقدامات کرنا ہوں گے۔دریں اثناء صوبائی وزیر نے سیکرٹریٹ میں ایک اور اجلاس کی صدارت کرتے ہوئے فیصل آبادانڈسٹریل سٹیٹ ڈویلپمنٹ اینڈ مینجمنٹ کمپنی کی کارکردگی کا جائزہ لیتے ہوئے کہا کہ ملکی اور غیرملکی سرمایہ کاروں کو تمام سہولتیں فراہم کی جائیں اور پنجاب میں سرمایہ کاری کے فروغ کے لئے کوئی کسر اٹھا نہ رکھی جائے-
