لاہور (مانیٹرنگ ڈیسک) پاکستان مسلم لیگ (ن) میں فارورڈ بلاک بن گیا، ن لیگ کے ناراض رہنما زعیم قادری نے ن لیگ میں الگ گروپ بنانے کا اعلان کر دیا ہے، زعیم قادری نے انٹرویو کے دوران انکشاف کرتے ہوئے کہا کہ بہت سے لوگوں سے رابطہ ہے چند روز میں نام سامنے آ جائے گا، الگ گروپ میں منتخب نمائندے، ٹکٹ ہولڈر اور تنظیمی صدر شامل ہوں گے، انہوں نے دوران انٹرویو کہا کہ یہ سب وہ لوگ ہیں جو ن لیگ میں موروثی سیاست کے خلاف ہیں، انہوں نے کہا کہ ق لیگ نے فارورڈ بلاک بنایا توہم انہیں منع کیا

کرتے تھے، زعیم قادری نے کہا کہ میں کوشش کر رہا ہوں اور کامیابی بھی حاصل ہو رہی ہے۔ دوسری طرف مسلم لیگ (ن) کے صدر شہباز شریف نے مخصوص نشستوں پر منتخب ہونے والی رکن عظمیٰ قادری کو شوکاز نوٹس دیتے ہوئے رکنیت سے استعفیٰ طلب کر لیا ہے، ٹی وی رپورٹ کے مطابق شہباز شریف کی طرف سے سابق صوبائی وزیر زعیم قادری کی اہلیہ عظمیٰ قادری کو جاری کیے گئے نوٹس میں کہا گیا ہے کہ عظمیٰ قادری سے پارٹی پالیسی پر عمل نہ کرنے کی وجہ سے استعفی طلب کیا گیا ہے۔