اوور سیز پاکستانیوں کیلئے ضمنی انتخابات میں آن لائن ووٹ کاسٹ کی سہولت میسر کردی گئی،ووٹ کیسے ڈالنا ہے؟ طریقہ کار کی تفصیلات جاری اسلام آباد (این این آئی)اوور سیز پاکستانیوں کو ووٹ ڈالنے کا حق ملتے ہی ضمنی انتخابات میں آن لائن ووٹ کاسٹ کی سہولت میسر کردی گئی۔سمندر پار پاکستانیوں کو ضمنی الیکشن میں ووٹ ڈالنے کے معاملے پر الیکشن کمیشن حکام کو بریفنگ دیتے ہوئے

چیئرمین نادرا عثمان مبین نے بتایا کہ اوور سیز پاکستانیوں کو ووٹ ڈالنے کا حق ملتے ہی ضمنی انتخابات میں آن لائن ووٹ کاسٹ کی سہولت میسر کردی گئی۔ انہوں نے کہا کہ آنیوالے ضمنی الیکشن میں تارکین وطن گھر بیٹھے آن لائن ووٹ ڈالیں گے، ووٹنگ کیلئے نائیکوپ کارڈ،پاسپورٹ اور ای میل ایڈریس لازمی ہو گا۔عثمان مبین نے طریقہ کار سے متعلق بتایا کہ ووٹر اپنا حق رائے دہی استعمال کرنے کیلئے ای میل اکاؤنٹ بنائے گا اور خود کار نظام تصدیق کیلئے ووٹرز سے مختلف سوالات بھی کریگا ،تصدیقی عمل مکمل کرنے پر ووٹر متعلقہ حلقے میں ووٹ ڈال سکے گا۔دوسری جانب الیکشن کمیشن حکام کا کہنا ہے کہ ضمنی انتخابات میں سمندر پار پاکستانیوں کو ووٹ کی سہولت مہیا کر دی ہے پہلے مرحلے میں مخصوص حلقوں سے تعلق رکھنے والے سمندرپارپاکستانی ووٹرز کی رجسٹریشن کی جائیگی،یکم ستمبر سے 15 ستمبر تک سمندرپار پاکستانیوں کی رجسٹریشن ہو گی۔الیکشن کمیشن کا کہنا ہے کہ سمندر پار پاکستانی الیکشن کمیشن کی ویب سائٹ یا www.overseasvoting.gov.pk پر 15 ستمبر تک رجسٹریشن کرا سکتے ہیں۔