لاہور(آئی این پی) سابق سپیکر قومی اسمبلی سردار ایاز صادق نے کہا ہے کہ چند دنوں کے با ت ہے نواز شر یف ہمارے در میان موجود ہوں گے انکے حوصلے بلند ہیں ‘ باتوں سے نیا پاکستان اور انقلاب نہیں آتاُ نئے پاکستان میں کون سا انصاف ہے ،ڈی پی او کو ایک شخص کاراستہ روکنے پر لائن حاضر کر دیا ‘اب عوام کو رکشے میں سفر کرنے کی ضرورت نہیں ، پی ٹی آئی والے ہیلی کاپٹر کی ریگولر سروس چلا دیں لوگ 60سے 65روپے دینے کیلئے تیار ہیں‘وزیر اعلیٰ پنجاب پروٹوکول لے کر ہسپتال گئے

اور ایک بچی زندگی کھو بیٹھی ،اس کیلئے کٹہرے میں کھڑا ہونا پڑے گااگر یہ سلسلہ جاری رہاتو ان کا راستہ روکیں گے اور احتساب کریں گےْ۔ وہ ہربنس پورہ میں عید ملن پارٹی کے موقع پر کارکنوں سے خطاب کررہے تھے اس موقع پر خواجہ سلمان رفیق ، شیخ روحیل اصغر ،ملک وحید سمیت دیگر بھی موجود تھے ۔ سردارایازصادق نے کہا کہ خواجہ سعد رفیق نے بھی عید ملن پارٹی میں آنا تھا مگر نیب والوں نے ان کیلئے چائے بسکٹ کااہتمام کر رکھاتھا جس کی وجہ سے نہیں آسکے ۔ انہوں نے کہا کہ الیکشن کمیشن شفاف انتخابات کرانے میں مکمل ناکام رہا ،اگر نگران حکومت کا بس چلتا تو سب (ن) لیگیوں کو جیل میں ڈال دیتے ۔انہوں نے کہا کہ جو لوگ برے وقت میں چھوڑ دیتے ہیں ان کی عزت نہیں رہتی ۔نوازشریف سے جیل میں چار بار ملاقات ہوئی اور انکے حوصلے بلند ہیں بس چند دنوں کی بات ہے وہ ہم سب میں ہوں گے ۔انہوں نے وفاقی وزیر اطلاعات فواد چوہدری کو تنقید کا نشانہ بناتے ہوئے کہا کہ اب عوام کو رکشے میں سفر کرنے کی ضرورت نہیں ،پی ٹی آئی والے ہیلی کاپٹر کی ریگولر سروس چلا دیں اس شہر کے لوگ ہیلی کاپٹر پر سفر کیلئے 60سے 65روپے دینے کیلئے تیار ہیں ۔پروٹوکول نہ لینے کا راگ الاپنے والے بارہ بارہ گاڑیاں اور ہیلی کاپٹر سے سفر کرتے ہیں،اب یہ نہ کہہ دیں کہ ہیلی کاپٹر سڑک پر چلائیں گے۔

دعویٰ سوچ سمجھ کر کرنا چاہئے ہم ان کو آئینہ دکھائیں گے وعدے بھی یاد کروائیں گے ۔ سردار ایاز صادق نے کہا کہ باتوں سے نیا پاکستان اور انقلاب نہیں آتا ،خدارا عوام کو جو وعدے کئے اسے پورا کریں ۔انہوں نے کہا کہ نئے پاکستان میں کون سا انصاف ہے ،ڈی پی او کو ایک شخص کاراستہ روکنے پر لائن حاضر کیاگیا ،وزیر اعلیٰ پنجاب پروٹوکول لے کر ہسپتال گئے اور ایک بچی زندگی کھو بیٹھی ،اس کیلئے کٹہرے میں کھڑا ہونا پڑے گا ۔وزیر اعلیٰ پچاس یا پچپن روپے ہیلی کاپٹر کا کرایہ دے کر ہسپتال گئے

اگر یہ سلسلہ جاری رہاتو ان کا راستہ روکیں گے اور احتساب کریں گےْ۔انہوں نے کہا کہ این اے 131 میں ضمنی الیکشن ہونے جارہاہے یہ ہمارا الیکشن ہو گا اس میں بھرپورحصہ لینا ہے ،14اکتوبر کو فیصلہ کن دن ہوگا ثابت کریں گے لاہور آج بھی (ن) لیگ کاقلعہ ہے۔اس موقع پر خواجہ سلمان رفیق نے خطاب کرتے ہوئے کہا کہ جتنی جلدی غیر مقبول جماعت کی ٹیم بن رہی ہے ووٹرز حیران اور پریشان ہیں مگر (ن) لیگ بھرپور اپوزیشن کرے گی اسمبلیوں کے اندر اور باہر جدوجہد جاری رکھیں گے ۔

انہوں نے کہا کہ (ن)لیگ کی صدارتی الیکشن پر مختلف جماعتوں سے بات چیت چل رہی ہے ۔شیخ روحیل اصغر نے کہا کہ سپورٹرز نے ان حالات میں (ن) لیگ کا ساتھ دے کر جو معرکہ مارا وہ معمولی بات نہیں ،ن لیگ کا صرف ایک ہی دولہا ہے اور وہ نوازشریف ہے،جب تک زندگی رہے گی کلمہ حق بلند کرتا رہوں گا ،کوئی مجھے مار دے یازبح کر دے لیکن حق کی بات کروں گا۔ انہوں نے کہا کہ ہمیں پرانا پاکستان ہی چاہئے جس میں محبت پیار باقی رہے۔