اسلام آباد(نیوز ڈیسک)بھارتی فوج کے نائب سربراہ لیفٹننٹ جنرل فلیپ کیمپوس سٹپٹا گئے،اگلے برسوں میں بھارت کی پاکستان اور چین کے ساتھ جنگ کرنے کا عندیہ دے دیا۔بھارتی میڈیا کے مطابق بھارت کے وزیر اعظم نریندر مودی کے چین کے دورے سے ٹھیک پہلے ملک کے نائب فوجی سربراہ لیفٹنٹ جنرل فلیپ کیمپوس نے حیران کرنے والا بیان دیا ہے۔نائب فوجی سربراہ نے کہا کہ اس صدی میں کبھی بھی چین اور ہندوستان کے درمیان جنگ ہو سکتی ہے۔لیفٹنٹ فلیپ نے کہا کہ دونوں ملک بڑی تیزی کے ساتھ ابھر رہے ہیں،اس کا اثر سرحد پر بھی دیکھا جا سکتا ہے۔دونوں ممالک کے درمیان پہلے سے ہی سر حدی تنازع تلخی کا سبب بنتا جارہا ہے۔اسی کے سبب چین ہندوستان کی سلامتی کے لئے بڑا خطرہ ہے۔ نوئیڈا میں آرمی انسٹی ٹیوٹ کے ایک پروگرام میں خطاب کرتے ہوئے نائب سربراہ نے کہا کہ ہندوستان کومیک ان انڈیاکی مہم کے تحت ملک میں ہی ہتھیاروں کی پیداوار پر زور دینا چاہئے۔نائب سربراہ نے پڑوسی ملک پاکستان کے حالات کو بھی ہندوستانی سلامتی کیلئے خطرہ قرار دیتے ہوئے کہا کہ پڑوسی ممالک میں طالبان، داعش اور القاعدہ جیسی دہشت گرد تنظیمیں عروج پر ہیں جو کبھی بھی ہندوستان کے دروازے پر دستک دے سکتے ہیں۔