اسلام آباد(مانیٹرنگ ڈیسک)خواجہ آصف کی تاحیات نااہلی ختم ہونے پرانکے سیاسی مخالف عثمان ڈار کا بھی ردعمل سامنے آگیا۔ تفصیلات کے مطابق سپریم کورٹ آف پاکستان نے آج سابق وزیر خارجہ خواجہ آصف کی تاحیات نا اہلی کے اسلام آباد ہائیکورٹ کے فیصلے کو کالعدم قرار دیتے ہوئے انہیں الیکشن لڑنے کی اجازت دیدی ہے۔ سپریم کورٹ کے فیصلے پر خواجہ آصف کے
سیاسی مخالف عثمان ڈار جن کی درخواست پر خواجہ آصف کو اسلام آباد ہائیکورٹ نے تاحیات نا اہل قرار دیا تھا کا بھی ردعمل سامنے آگیا ہے۔ سپریم کورٹ کے باہر میڈیا سے گفتگو کرتے ہوئے عثمان ڈار کا کہنا تھا کہ خواجہ آصف کی تاحیات نااہلی ختم ہونے پر انہیں مبارکباد دیتا ہوں لیکن جب خواجہ آصف کو نااہل کیا گیا تھا تو انہوں نے کہا تھا کہ عثمان ڈار مجھے سیالکوٹ میں شکست نہیں دے سکا تو اس نے عدالتوں کا سہارا لیا۔ساتھ ہی انہوں نے کہا کہ مجھے خوشی ہے کہ اب خواجہ آصف سے میرا مقابلہ سیالکوٹ کی عوام کی عدالت میں ہو گا۔عدالت عظمیٰ کے فیصلے کے حوالے سے پی ٹی آئی رہنما نے مزید کہا کہ میں مریم نواز اور نواز شریف کو خصوصی پیغام دینا چاہتا ہوں کہ یہ وہی سپریم کورٹ ہے جس کے لیے آپ لوگ تضحیک آمیز باتیں کرتے ہیں لیکن آج عدلیہ نے ان کا وزیر خارجہ بحال کر دیا ہے۔واضح رہے کہ سپریم کورٹ نے آج خواجہ آصف کی تاحیات نا اہلی سے متعلق اسلام آباد ہائیکورٹ کے فیصلے کو کالعدم قرار دے کر ان کی تاحیات نااہلی ختم کر دی ہے۔خیال رہے کہ اسلام آباد ہائیکورٹ نے رواں برس 26 اپریل کو تحریک انصاف کے رہنما عثمان ڈار کی درخواست پر فیصلہ سناتے ہوئے اُس وقت کے وزیر خارجہ خواجہ آصف کو تاحیات نااہل قرار دیا تھا۔خیال رہے کہ خواجہ آصف کی نا اہلی کا فیصلہ آنے پر تحریک انصاف کے چیئرمین عمران خان نے عثمان ڈار کو شاباش دی تھی جبکہ سیالکوٹ میں بھی پی ٹی آئی کارکنوں نے بھرپور جشن منایا تھا۔
