گوجرانوالہ (مانیٹرنگ ڈیسک) عمرہ کے نام پر سعودی عرب جانے والے آٹھ پاکستانیوں کو گرفتار کر لیا گیا، ایک نجی ٹی وی چینل کی رپورٹ کے مطابق عمرہ کے نام پر سعودیہ جاکر بھیک مانگنے کی شکایات پر ایف آئی اے نے سیالکوٹ ائیر پورٹ سے عمرہ پر جانے والے آٹھ بھکاریوں کو گرفتار کر لیا ہے۔ ٹی وی ذرائع کے مطابق وفاقی تحقیقاتی ادارے کی ایک ٹیم نے سیالکوٹ ائیر پورٹ پر چھاپہ مار کر عمرہ کے ویزے پر سعودی عرب جانے والے
آٹھ بھکاریوں کو گرفتار کر لیا۔ ایف آئی اے کا کہنا ہے کہ گرفتار بھکاریوں میں تین خواتین اور پانچ مرد ہیں، جن میں گلفام، وریام، رفیع، فخر علی، بلال، شریفاں بی بی، مسرت اور مجاہداں بی بی شامل ہیں۔ واضح رہے کہ حکومت کو شکایات ملی ہیں کہ ہر سال رمضان کے مہینے میں خصوصاً عمرہ کے نام پر سعودی عرب جانے والے افراد میں بڑی تعداد میں بھکاری بھی ہوتے ہیں جو وہاں جا کر بھیک مانگنے کے نام پر ملکی وقار کی توہین کرتے ہیں۔
