میلبورن(مانیٹرنگ ڈیسک)کرکٹ آسٹریلیا نے مالی وجوہات کی بنا پر رواں برس بنگلہ دیش کے خلاف شیڈول ہوم سیریز منسوخ کر دی۔ طے شدہ شیڈول کے تحت بنگلہ دیشی ٹیم نے اگست اور ستمبر میں دو ٹیسٹ اور تین ایک روزہ بین الاقوامی میچوں کی سیریز کیلئے آسٹریلیا کا دورہ کرنا تھا لیکن کرکٹ آسٹریلیا نے سیریز منافع بخش نہ ہونے کی وجہ سے ہوم سیریز کی میزبانی سے ہی انکار کر دیا۔کرکٹ آسٹریلیا کی طرف سے جاری کردہ بیان کے مطابق بنگلہ دیش کے خلاف ہوم سیریز آسٹریلیا میں فٹ بال سیزن سےمتصادم ہے اور براڈ کاسٹر بھی

کرکٹ میچز نشر کرنے میں دلچسپی نہیں رکھتے اسلئے ہمیں اس سیریز میں کوئی مالی فائدہ نظر نہیں آ رہا جس کے باعث سیریز کو منسوخ کرنے کا فیصلہ کیا گیا اور بنگلہ دیش کرکٹ بورڈ کو بھی آگاہ کر دیا گیا ہے۔ دوسری جانب بی سی بی کے چیف ایگزیکٹو نظام الدین چوہدری نے کہا کہ ہم نے کرکٹ آسٹریلیا کو آئندہ برس ورلڈ کپ کے بعد دورے کی دعوت سمیت کئی دوسرے آپشنز کی تجاویز دی ہیں تاہم کرکٹ آسٹریلیا کی جانب سے تاحال کوئی ردعمل سامنے نہیں آیا۔ واضح رہے کہ یہ بنگلہ دیش نے آخری بار 2003 میں آسٹریلیا کا دورہ کیا تھا۔