اسلام آباد(نیو ز ڈیسک)باجوڑ ایجنسی میں پیپلز پارٹی کے سابق رکن قومی اسمبلی اخونزادہ چٹان قاتلانہ حملے میں بال بال بچ گئے، قافلے میں موجود 2 گاڑیاں مکمل طور پر تباہ ہوگئیں،صدر ،وزیر اعظم نے حملے کی شدید مذمت کی ۔میڈیا رپورٹس کے مطابق باجوڑ ایجنسی کے علاقے سالارزئی میں ماندل کے مقام پر دہشت گردوں نے پیپلز پارٹی کے رہنما وسابق رکن قومی اسمبلی اخونزادہ چٹان کے قافلے کو ریموٹ کنٹرول بم سے نشانہ بنایا جس کے نتیجے میں اخونزادہ چٹان معجزانہ طور پر محفوظ رہے جبکہ قافلے میں موجود 2 گاڑیاں مکمل طور پر تباہ ہوگئیں اور کسی قسم کا کوئی جانی نقصان نہیں ہوا۔واقعہ کے سکیورٹی فورسز جائے وقوعہ پر پہنچ گئی اور علاقے کو گھیرے میں لے کر سرچ آپریشن شروع کردیا ،پیپلز پارٹی کے رہنما اخونزادہ چٹان کو محفوظ مقام پر منتقل کر دیا گیا ہے ۔ادھر صدر مملکت ممنون حسین اور وزیر اعظم نواز شریف اخونزادہ چٹان پر حملے کی شدید الفاظ میں مذمت کی ہے اور ملک سے دہشت گردی اور انتہا پسندی کا مکمل خاتمے کا اعادہ کیا ہے،وزیر اعظم نے کہا کہ ملک میں دہشت گردوں کے نیٹ ورک کو تباہ کر دیا ہے ،آپریشن ضرب عضب کے باعث دہشت گرد بھاگ رہے ہیں،اخونزادہ چٹان پر بزدلانہ حملہ دہشت گردوں کی مایوسی کو ظاہر کرتے ہیں۔