اسلام آباد(نیوز ڈیسک)نائجیریا کی فوج نے اسلامی شدت پسند گروہ بوکو حرام کی قید سے مزید 234 خواتین اور بچوں کو رہا کروالیا ۔خیال رہے کہ رواں ہفتے کے آغاز میں بھی فوج نے تقریباً300 بچوں اور خواتین کو رہا کروایا تھا لیکن ان میں چیبوک سکول کی کوئی لڑکی شامل نہیں تھی۔سماجی رابطے کی ویب سائٹ ٹوئٹر پر اپنے پیغام میں فوجی حکام نے لکھا ہے کہ ملک کے شمال مشرق میں سیمبیسا کے جنگلات میں موجود شدت پسندوں کے خلاف کارروائی کی گئی تاہم ابھی یہ واضح نہیں ہے کہ رہا ہونے والوں میں گذشتہ سال اپریل میں اغوا ہونے والی چیبوک سکول کی 200 سے زائد طالبات میں سے کوئی شامل ہے یا نہیں۔سماجی رابطے کی ویب سائٹ ٹوئٹر پر اپنے پیغام میں فوجی حکام کی جانب سے لکھا گیا کہ ’جمعرات کو مزید 234 خواتین اور بچوں کو کورئی اور کنڈونگا کے علاقوں سے بحفاظت نکالا گیا۔فوجی حکام کا کہنا ہے کہ رہا ہونے والوں کی شناخت معلوم کرنے کے لیے ان سے پوچھ گچھ کی جا رہی ہے۔اس سے قبل نائجیریا کے فوجی حکام نے دعویٰ کیا تھا کہ انھوں نے سیمبیسا کے جنگلات میں اسلامی شدت پسند گروہ کے 13 کیمپوں کو تباہ کر دیا ہے۔یاد رہے کہ بوکو حرام کی مسلح بغاوت میں سنہ 2012 سے اب تک 15 ہزار سے زائد افراد ہلاک ہو چکے ہیں اور تشدد کی یہ لہر اب پڑوسی ممالک نائجر، چاڈ اور کمیرون تک پھیل گئی ہے۔