لاہور (نیوزڈیسک) پاکستان کرکٹ ٹیم کے سابق کپتان شعیب ملک نے زمبابوے کے خلاف ہوم گراﺅنڈ میں کھیلنے کی خواہش کا اظہار کرتے ہوئے کہا ہے کہ تینوں فارمیٹ میں پاکستان کی نمائندگی کرنا چاہتا ہوں ،ابھی میں 33سال کا ہوں ،43کا نہیں۔ نیشنل کرکٹ اکیڈمی لاہور میں میڈیا سے گفتگو کرتے ہوئے شعیب ملک نے کہا کہ کرکٹ میرا جنون ہے۔ تینوں فارمیٹ کھیلنا چاہتا ہوں۔ جب تک فٹ ہوں پاکستان کے لیے کھیلتا رہوں گا۔ ویسے بھی ابھی 33 سال کا ہوں 43کا نہیں۔شعیب ملک نے کہا کہ ڈومیسٹک اور دنیا بھر کی لیگز میں اچھا پرفارم کر رہا ہوں لیکن اس کا مطلب یہ نہیں ہونا چاہیے کہ مجھ پر ٹی ٹونٹی کی چھاپ لگا دی جائے۔ زمبابوے کے خلاف ہوم گراﺅنڈ میں کھیلنا چاہتا ہوں تاہم کھلانا یا نہ کھلانا سلیکٹرز اور بورڈ کا کام ہے۔انہوں نے کہا کہ دورہ زمبابوے کو کامیاب بنانے کے لیے سب کو مل کر کام کرنا ہو گا تاکہ دنیا کو مثبت پیغام پہنچے۔