گوجرانوالہ (مانیٹرنگ ڈیسک)گوجرانوالہ پی ٹی آئی امیدواروں نے انتخابی پینا فلیکسز پر عمران خان کے ساتھ آرمی چیف اور چیف جسٹس کی تصاویر لگوا دیں۔ تفصیلات کے مطابق گوجرانوالہ کے حلقہ این اے 80سے تحریک انصاف کے امیدوار ناصر چیمہ اور صوبائی حلقے پی پی 53کے امیدوار مہر ناصر حسین آرمی چیف اور چیف جسٹس کے حق میں ایک ریلی نکال چکے ہیں۔ ناصر چیمہ نے 20اپریل کو آرمی چیف اور چیف جسٹس کی حمایت میں ایک ریلی نکالی تھی،

ریلی کے سلسلے میں اخبارات میں بھی اشتہارات دئیے گئے تھے ، ریلی سینکڑوں گاڑیوں پر مشتمل تھی ۔ گاڑیوں پر سوار ریلی کے شرکا نے آرمی چیف اور چیف جسٹس کی حمایت میں بینرز اور پلے کارڈز اٹھا رکھے تھے ۔ ان پلے کارڈز پر عوام، آرمی اور عدلیہ کے ایک پیج پر ہونے سے متعلق نعرے اور تحریریں درج تھیں۔ ریلی ختم ہوتے ہی مقامی انتظامیہ نے آرمی چیف اور چیف جسٹس کی تصاویر والے بینرز اتار دئیے تھے جس پر تحریک انصاف کی مقامی قیادت نے شدید احتجاج کیا تھا۔