اسلام آباد (آن لائن)وزارت داخلہ کا دباؤ اسلام آباد انتظامیہ نے شریف خاندان کی کرپشن میں مبینہ فرنٹ مین بیورکریٹ احد چیمہ ڈائریکٹر جنرل لاہور ڈویلپمنٹ اتھارٹی(ایل ڈی اے)کے اسلام آباد میں اثاثہ جات کے متعلق تفصیلات دینے سے انکار کر دیا ہے۔ذرائع نے آن لائن کو بتایا اسسٹنٹ ڈائریکٹر نیب حافظ عثمان علی کی جانب سے لکھے گئے خط کا جواب دینے سے اسلام آباد انتظامیہ نے صاف انکار کر دیا ہے۔

نیب حکام کی جانب سے کئی بار اسلام آباد انتظامیہ سے رابطہ کیا گیا لیکن وزیر داخلہ احسن اقبال کے دباؤ کی وجہ سے اسلام آباد انتظامیہ کے افسران نے تاحال کوئی جواب نہیں دیا۔نیب حکام کی جانب سے لکھے گئے خط میں احد خان چیمہ والد محمد اسلم چیمہ احمد سعود چیمہ ولد محمد اسلم سعدیہ منصور دختر محمد اسلم ،احمد حسن ولد بشارت امجد،نشاط زوجہ محمد اسلم۔اور دیگر خاندان کے افراد کے نام شامل ہیں۔چودہ مارچ 2018کو لکھے گئے خط میں نیب حکام کی جانب سے مزکورہ بالا 9افراد کی اسلام آباد میں گاڑیوں اور پراپرٹی کی تفصیلات کے حوالے سے 19مارچ 2018سے پہلے آگاہ کرنے کی استدعا کی گئی تھی۔لیکن اس کے باوجود اسلام آباد نتظامیہ کی جانب سے نیب حکام کو ہاں یا ناں میں کوئی جواب نہیں دیا گیا ۔انتظامیہ نے معاملے کو دبانے کی کوشش شروع کر دی ہے۔ذرائع کا مزید کہنا تھا کہ وزیر داخلہ احسن اقبال کی کے دباؤ کی وجہ سے اسلام آباد انتظامیہ کی جانب سے تاحال ٹال مٹول سے کام لیا جارہا ہے۔آن لائن کے کئی بار رابطے پراس حوالے سے ترجمان وزارت داخلہ اور اسلام آباد انتظامیہ کے افسران کی جانب سے بات کرنے سے گریز کیا گیا۔واضع رہے نیب حکام کی جانب سے ڈائریکٹر جنرل ایل ڈی اے کے خلاف غیر قانونی اثاثہ جات کے حوالے سے تحقیقات جاری ہے۔