آج پاکستان میں پہلی بار کسی سیاسی جماعت نے ووٹ بیچنے پر اپنے 20 سیٹنگ ایم پی ایز کو پارٹی سے نکالنے کا اعلان کیا‘ عمران خان کا یہ قدم انتہائی قابل تعریف اور قابل تقلید ہے‘ ہم اس بڑے فیصلے پر عمران خان کو خراج تحسین پیش کرتے ہیں‘
اب میاں نواز شریف اور آصف علی زرداری کو بھی عمران خان کے نقش قدم پر چلتے ہوئے ان تمام ایم پی ایز اور ایم این ایز کو پارٹی سے نکال دینا چاہیے جو ووٹ کے لین دین میں ملوث تھے‘ سینٹ کے اسی الیکشن میں ن لیگ کے 14 ایم پی ایز نے چودھری سرور کو ووٹ دیئے تھے‘ میاں صاحب کو بھی باقاعدہ تحقیقات کر کے ان 14 لوگوں کو پارٹی سے نکال دینا چاہیے‘ میری عمران خان سے بھی درخواست ہے آپ جس طرح بکنے والوں کے نام سامنے لے کر آئے آپ اسی طرح اس شخص کا نام بھی بتادیں جس نے آپ کے ایم پی ایز کو چار چار کروڑ روپے دیئے تھے‘ وہ شخص بھی قومی مجرم ہے‘ اس کا نام بھی سامنے آنا چاہیے اور وہ شخص بھی معلوم ہونا چاہیے جس نے ایم پی ایز خریدنے کیلئے ایک ارب 20 کروڑ روپے دیئے تھے‘ قوم کو ان سینیٹرز کے نام بھی معلوم ہونا چاہئیں جن کے لئے یہ ووٹ خریدے گئے تھے‘ ان لوگوں کی سینیٹر شپ بھی ختم ہونی چاہیے‘ یہ لوگ بھی قوم کے مجرم ہیں‘ انہیں بھی سزا ہونی چاہیے‘ عمران خان اگر یہ نام نہیں بتاتے تو یہ آدھا سچ ہوگا اور آدھا سچ قوم کی خدمت نہیں ہوتا‘ خواتین وحضرات ووٹ کس نے بیچے‘ کیوں بیچے‘ کس نے خریدے اور اس جہاد میں صرف عمران خان کیوں‘ باقی جماعتیں اپنی پارٹیوں کو اس گند سے صاف کیوں نہیں کرتیں‘ یہ ہمارا آج کا ایشو ہوگا‘ ہمارے ساتھ رہیے گا۔
