اسلام آباد (نیوز ڈیسک) مسلم لیگ (ضیاء) کے سربراہ اعجاز الحق نے جنوبی پنجاب محاذ میں شامل ہونے کا فیصلہ کر لیا ہے جبکہ رحیم یار خان سے جاوید وڑائچ اور دوست محمد کھوسہ تحریک انصاف میں شامل ہوں گے۔ میڈیا رپورٹس کے مطابق بہاولپور سے ایم این اے اعجاز الحق نے جنوبی پنجاب محاذ میں شمولیت کا فیصلہ کر لیا ہے، ذرائع کا کہناہے کہ رحیم یار خان سے پیپلز پارٹی کے رہنما جاوید وڑائچ اور سابق وزیراعلیٰ پنجاب
دوست محمد کھوسہ نے تحریک انصاف میں شمولیت کا فیصلہ کر لیا ہے جو جنوبی پنجاب کی سیاست میں ایک بڑی پیش رفت ہے، یاد رہے کہ گزشتہ روز مسلم لیگ کے آٹھ ممبران قومی و صوبائی اسمبلی نے استعفے دے کر جنوبی پنجاب محاذ میں شمولیت اختیار کر لی تھی اور حالیہ پیش رفت بھی اسی سلسلے کی ایک کڑی ہے، ذرائع کا یہ بھی کہنا ہے کہ جنوبی پنجاب سے مزید سیاسی رہنما جنوبی پنجاب محاذ میں جانے کے لیے تیار ہیں۔
