سڈنی(آئی این پی)کرکٹ آسٹریلیا نے سال 2018-19 کیلئے کھلاڑیوں کے نئے سالانہ سینٹرل کنٹریکٹس کا اعلان کر دیا، آئندہ برس شیڈول آئی سی سی ون ڈے ورلڈ کپ کو مدنظر رکھتے ہوئے 5 نئے کھلاڑیوں کو بھی کنٹریکٹس سے نوازا گیا ہے، بال ٹیمپرنگ کے باعث معطلی کا شکار سٹیون سمتھ، ڈیوڈ وارنر اور کیمرون بینکرافٹ کو فہرست سے خارج کر دیا گیا ہے البتہ وکٹ کیپر بلے باز ٹم پین جگہ بنانے میں کامیاب رہے۔

انہیں 2017-18 میں کنٹریکٹ نہیں دیا گیا تھا۔کرکٹ آسٹریلیا نے 20 کھلاڑیوں کیلئے نئے سالانہ سینٹرل کنٹریکٹس کا اعلان کر دیا، فہرست میں اس بار پانچ نئے کھلاڑیوں کو بھی شامل کیا گیا ہے جن میں مارکس سٹوئنس، ایلکس کیری، جے رچرڈسن، کین رچرڈسن اور اینڈریو ٹائی شامل ہیں، شان مارش اور ٹم پین بھی دوبارہ کنٹریکٹس حاصل کرنے میں کامیاب رہے جبکہ جیکس برڈ، ہلٹن کارٹرائٹ، جیمز پیٹنسن، میتھیوویڈ اور ایڈم زمپا کو فارغ کر دیا گیا، بال ٹیمپرنگ کے باعث پابندی کا شکار سٹیون سمتھ، ڈیوڈ وارنر اور کیمرون بینکرافٹ کو بھی باہر کر دیا گیا ہے۔اعلان کردہ سینٹرل کنٹریکٹس فہرست میں آشٹن ایگر، ایلکس کیری، پیٹ کمنز، ایرون فنچ، پیٹر ہینڈزکامب، جوش ہیزلووڈ، ٹریوس ہیڈ، عثمان خواجہ، نیتھن لیون، گلین میکسویل، شان مارش، مچل مارش، ٹم پین، میتھیو رین شا، جے رچرڈسن، کین رچرڈسن، بلی سٹین لیک، مچل سٹارک، مارکس سٹوئنس اور اینڈریو ٹائی شامل ہیں۔