ماسکو ( این این آئی)وفاقی وزیر وزیردفاع انجینئر خرم دستگیر خان نے کہا ہے کہ پاکستان روس سے جدیدترین فوجی آلات خریدے گا،پاکستان طویل مدتی معاہدے کے تحتT-90ٹینکوں کی خریداری میں گہری دلچسپی رکھتا ہے،ایس یو۔35لڑاکا طیاروں کی خریداری کے لیے مذاکرات ابھی ابتدائی مرحلے میں ہیں۔روسی خبر رساں ادارے کے ساتھ گفتگو کرتے ہوئے وفاقی وزیر دفاع نے کہا کہ دفاعی شعبے میں 2014میں پاک روس دفاعی معاہدہ پر دستخط کئے گئے جسکے نتیجے میں ہم نے فوجی مشقوں کا انعقاد کیا ۔

پاکستان نے ایم آئی35ہیلی کاپٹر خریدے اور اب ہم فوجی مشقوں، آلات اور خفیہ معلومات کے تبادلے سمیت وسیع تر دفاعی تعاون کے لئے پر امید ہیں۔جنوبی اور وسطی ایشیا میں سیکورٹی امور کے بارے میں باتیں کرتے ہوئے وزیردفاع نے کہا کہ پاکستان اور روس دونوں مستحکم اور جمہوری افغانستان میں دلچسپی رکھتے ہیں۔انہوں نے افغانستان میں استحکام کیلئے روس کے اقدامات کو سراہا اور دوسری عالمی طاقتوں پر زور دیا کہ وہ دہشتگردی کے خاتمے کیلئے اسی طرح کی حکمت عملی وضع کریں۔پاکستان طویل مدتی معاہدے کے تحت ٹی 90 ٹینک، لڑاکا جیٹ طیارے اور دفاعی نظام کی خریداری میں دلچسپی رکھتا ہے، اس حوالے سے روس سے بات چیت جاری ہے۔اخرم دستگیر نے کہاکہ پاکستان افغانستان میں استحکام کیلئے روس کے اقدامات کا معترف ہے اور دیگر عالمی طاقتوں کو بھی دعوت دیتا ہے کہ وہ روس کی طرح دہشت گردی کے خاتمے کے لئے اپنی حکمت عملی وضع کریں۔