اسلام آباد(مانیٹرنگ ڈیسک)ن لیگ کی صادق سنجرانی کے خلاف مہم کی وجہ سے سامنے آگئی، شیخ رشید نے تہلکہ خیز انکشاف کر ڈالا۔ تفصیلات کے مطابق عوامی مسلم لیگ کے سربراہ شیخ رشید احمد نے نجی ٹی وی سے گفتگو کرتے ہوئے کہا ہے کہ میری خواہش ہے کہ مارشل لا نہ لگے ، ہم ایک دوسرے کو گالی دے رے ہیں لیکن عوام کی بات کوئی نہیں کر رہا۔
امریکہ نہیں چاہتا کہ یہاں سی پیک منصوبہ وجود میں آئے۔ شیخ رشید نے کہا کہ حکومت جتنا چاہے زور لگا لے الیکشن وقت پر نہیں ہونگے۔ میرے خیال میں نومبر کے پہلے یا اکتوبر کے آخری ہفتے سے قبل الیکشن نہیں ہو رہے۔ ایل این جی کا کیس اب بھی التوا میں پڑا ہے۔ احتساب ہونا چاہئے لیکن الیکشن نہیں رکنے چاہئیں۔ میں نواز شریف خاندان کی سیاست نہیں دیکھ رہا ۔ ہو سکتا ہے کہ شہباز شریف بھی فارغ ہو جائیں۔ شہباز شریف میں اتنی طاقت نہیں کہ وہ نواز شریف کے سامنے کھڑے ہوں۔ ان کیلئے سب سے اہم بات سزا سے بچنا ہے لیکن میں نواز شریف اور مریم نواز کو سزا ہوتی دیکھ رہا ہوں۔ چند ہفتوں میں صادق سنجرانی ملک کے صدر ہونگے ۔ نواز شریف کی معافی کی تمام اپیلیں صادق سنجرانی کے پاس جائیں گی جب وہ قائمقام صدر ہونگے۔ شریف برادران نے نیب کو بھی ڈرانے کی کوشش کی ۔ یہ لوگ اداروں کو خریدنے یا ڈرانے کی کوشش کرتے ہیں۔ اگلا نگران وزیراعظم ماہر اقتصادیات ہی ہو گا۔میرے اختیارمیں ہوتا تو کسی چیف جسٹس کو نگران وزیراعظم بناتا۔ مشرف واپس نہیں آئیں گے اور میرا بھی انہیں مشورہ ہے کہ واپس نہ آئیں۔شیخ رشید کا کہنا تھا کہ وزیراعظم شاہد خاقان عباسی کی امریکی نائب صدر سے ملاقات سیاسی نوعیت کی تھی۔ میں سمجھتا ہوں کہ نگران سیٹ اپ کیلئے دھاندلی شروع ہو گئی ہے۔ چیف جسٹس چاروں صوبوں
کی نگران اور مرکزی حکومت کا فیصلہ کریں، میری باتوں کو ہوا میں اڑایا جا رہا ہے۔
