کراچی (آئی این پی) ایم کیو ایم پاکستان کے سربراہ فاروق ستار نے کہا ہے کہ چیئرمین سینٹ کیلئے (ن) لیگ کی حمایت کا فیصلہ رابطہ کمیٹی کے مشاورتی اجلاس میں ہوگا‘ دو سے تین بڑے وعدے نواز شریف کے دور سے چلے آرہے ہیں‘ چیئرمین اور ڈپٹی چیئرمین سینٹ کے لئے خالد مقبول صدیقی کو مل کر فیصلہ کرنا چاہئے‘ بہادر آباد کا پیپلز پارٹی کی حمایت کا یکطرفہ فیصلہ سنگین غلطی ہوگی‘ میں پارٹی کو بکھرنے نہیں دوں گا ۔
کراچی کے سارے مسائل پیپلز پارٹی کی وجہ سے ہیں۔ جمعہ کو فاروق ستار نے مسلم لیگ ن کے وفد کے ہمراہ میڈیا سے گفتگو کرتے ہوئے کہا کہ پارٹی کو بکھرنے نہیں دوں گا۔ (ن) لیگ کی حمایت کا فیصلہ رابطہ کمیٹی مشاورتی اجلاس میں ہوگا ملاقات کا بنیادی مقصد چیئرمین‘ ڈپٹی چیئرمین سینٹ کا انتخاب ہے۔ دو سے تین بڑے وعدے نواز شریف کے دور سے چلے آرہے ہیں بڑا مسئلہ کراچی‘ حیدر آباد پیکج ہے جس پر پیش رفت نہ ہوئی۔ حکومت کے جانے سے پہلے یہ کام ہوا تو حیدر آباد کو ریلیف ملے گا کے پی ٹی کے گیارہ سو ملازمین کی بحالی کے معاملے پر بات ہوئی۔ ناظم آباد میں پاسپورٹ آفس دوبارہ کھلنا چاہئے۔ انہوں نے کہا کہ چیئرمین‘ ڈپٹی چیئرمین سینٹ کے لئے خالد مقبول صدیقی کو مل کر فیصلہ کرنا چاہئے۔ خالد مقبول نے اس معاملے پر مجھ سے مشاورت نہیں کی حیدر آباد میں زمین کا تعین ہوگیا ہے امید ہے اس کا سنگ بنیاد رکھ دیا جائے گا۔ میں مانتا ہوں زیادہ تر سینیٹرز خالد مقبول کے پاس ہیں شہلا رضا نے کہا کہ ایم کیو ایم والے ایسے لڑرہے ہیں جیسے کتے بھونکتے ہیں بہادر آباد کا پی پی کی حمایت کا یک طرفہ فیصلہ سنگین غلطی ہوگی میں یہ غلطی نہیں ہونے دوں گا۔ پی پی سے بغیر معافی منگوائے فیصلہ کیا تو ووٹرز کی توہین ہوگی۔ کراچی کے سارے مسائل پیپلز پارٹی کی وجہ سے ہیں۔ بہادر آباد کے ساتھیوں کو وارننگ دیتا ہوں معافی کے بغیر ووٹ دیا تو کراچی کے لوگوں سے زیادتی ہوگی۔
