لاہور ( این این آئی) لاہور ہائیکورٹ نے جماعۃ الدعوۃ کے سربراہ حافظ محمد سعید کی ممکنہ گرفتاری کے خلاف دائر درخواست پر حکومت کو جواب داخل کرانے کے لیے مہلت دے دی اور ساتھ ہی حافظ محمد سعید کو گرفتار نہ کرنے کے احکامات میں توسیع کر دی۔گزشتہ روز لاہور ہائیکورٹ کے جسٹس امین الدین خان نے حافظ محمد سعید کی درخواست پر سماعت کی جس میں گرفتاری کا خدشہ ظاہر کیا گیا تھا۔درخواست میں
حافظ سعید کے وکیل اے ڈوگر نے دعویٰ کیا تھا کہ امریکہ اور بھارت کے دباؤ پر پاکستانی حکومت ممکنہ طور پر درخواست گزار کے خلاف کارروائی کرنا چاہتی ہے جبکہ امریکہ نے پاکستان کو حافظ محمد سعید کی گرفتاری کا کہہ بھی دیا ہے۔سماعت کے دوران وفاقی اور صوبائی حکومت کے وکلا نے جواب داخل کرانے کے لیے وقت مانگا جس پر عدالت نے انہیں مہلت دیتے ہوئے مزید کارروائی 4 اپریل تک ملتوی کر دی گئی۔
