کراچی ۰این این آئی) سینیٹ انتخابات سے چند گھنٹے قبل وزیراعلی ہاؤس میں پیپلزپارٹی کے عشائیہ میں شرکت کرنے والی متحدہ قومی موومنٹ کی ارکان سندھ اسمبلی ہیرسوہو اورنائلہ منیر نے پیپلزپارٹی میں شمولیت کا فیصلہ کرلیا ہے ۔ پیپلزپارٹی سندھ کے صدرنثارکھوڑو نے اس بات کی تصدیق کی ہے کہ ہیرسوہو اورنائلہ منیر نے تو پیپلزپارٹی میں شمولیت اختیارکرلی ہے اوربہت جلد وہ ایک پریس کانفرنس میں شمولیت کا باضابطہ اعلان کردیں گی۔
متحدہ قومی موومنٹ کی رکن سندھ اسمبلی ہیرسوہو کا اس حوالے سے کہنا ہے کہ وزیراعلی ہاؤس میں دیے گئے عشائیے کے روز ہی میں پیپلزپارٹی میں شامل ہوگئی تھی۔ہیر سوہو کا مزید کہنا ہے کہ ایم کیو ایم کے ٹکٹ پر اب سندھ اسمبلی میں نہیں آؤں گی ۔انہوں نے کہا کہ سینیٹ انتخابات میں خواتین کی کردار کشی پر بے حد افسوس ہے۔واضح رہے کہ ہیرسوہو کی فیملی کی سرکردہ شخصیات اس سے قبل پیپلزپارٹی سے وابستہ تھیں اورضلع ٹھٹھہ کے بااثرسیاستدانوں کی مخالفت کا مقابلہ کرنے کے لیے انہوں نے پیپلزپارٹی چھوڑ کرمتحدہ قومی موومنٹ جوائن کی تھی۔
