اسلام آباد (مانیٹرنگ ڈیسک)جعلی خاتون سی آئی ڈی آفیسر ساتھیوں سمیت گرفتار، کاروباری لوگوں کو لوٹتی رہی، پولیس نے رنگے ہاتھوں گرفتار کر لیا۔ روزنامہ خبریں کی رپورٹ کے مطابق سب انسپکٹر شاہد پرویز نے بتایا کہ مخبر خاص نے مجھے اطلاع دی کہ ایک خاتون مرد ساتھیوں کے ہمراہ اڈا خیر پور کے مختلف کاروباری مراکز پر جاکر خود کو سی آئی ڈی کی نمائندہ ظاہرکرکے لوٹ مار میں مصروف ہے، جب میں لیڈی پولیس کے ہمراہ وہاں پہنچا توراشد کلینک پر یہ لوگ موجود تھے جنہیں قابو کرلیا گیا۔

دوران تفتیش خاتون نے اپنا نام نبیلہ دختر محمد علی کمہار ساکن کھسیانوالی چورستہ میاں خاں بتایا جبکہ اس کے ساتھی محمد امین موچی اور امانت علی کمہار ساکنائے سیون ڈی ٹھکر کی کے رہائشی ہیں، خاتون ہاتھ میں ٹچ والا موبائل پکڑے کرائے کی کار میں کارروائیاں ڈالتی تھی۔میڈم نبیلہ نے شناختی کارڈ پر مستقل پتہ جہلم عارضی گجرات لکھوایا جبکہ وہ رہائشی چورستہ میاں خاں کی ہے جس کے پرس سے جعلی کارڈز بھی برآمد ہوئے ہیں، خاتون اور اس کے ساتھیوں کے خلاف جعلسازی کا مقدمہ 126/18درج کرلیا گیا ہے۔