اسلام آباد(مانیٹرنگ ڈیسک) پرویز مشرف کو پارٹی صدارت سے ہٹانے کیلئے دائر درخواست پر لاہور ہائیکورٹ نے مشرف کی نااہلی کا عدالتی حکم نامہ طلب کر لیا۔ تفصیلات کے مطابق آج جمعہ کے روز لاہور ہائیکورٹ میں پرویز مشرف کو پارٹی صدارت سے ہٹانے کیلئے دائر درخواست پر سماعت ایک رکنی بنچ نے کی۔ ایک رکنی بنچ کے رکن جسٹس شاہد کریم نے پرویز مشرف کو

پارٹی صدارت سے ہٹانے کیلئے دائر درخواست پر مشرف کی نااہلی کا عدالتی حکم نامہ طلب کر لیاہے۔ پرویز مشرف کے خلاف درخواست مقامی وکیل محمد آفاق ایڈووکیٹ نے لاہور ہائیکورٹ میں دائر کر رکھی ہے۔ درخواست گزار نے درخواست میں موقف اختیار کیا ہے کہ آئین کے آرٹیکل 62، 63 کے تحت پرویز مشرف کو 2013 کے الیکشن میں نا اہل قرار دیا گیا تھا، پولیٹیکل پارٹیز آرڈر اینڈ رولز کے تحت نا اہل شخص پارٹی صدر نہیں بن سکتا، سپریم کورٹ نواز شریف کو بھی اسی قانون کے تحت پارٹی صدارت سے نا اہل کر چکی ہے۔انہوں نے کہا کہ بطور پارٹی صدر پرویز مشرف کی جانب سے کئے گئے تمام فیصلے کالعدم قرار دئیے جائیں اور عدالت پرویز مشرف کو پارٹی صدارت کے عہدے سے نا اہل کرنے کا حکم دے۔ انہوں نے مزید استدعا کی کہ آل پاکستان مسلم لیگ کے تمام ممبران اسمبلی کو بھی نا اہل قرار دیا جائے اور عدالت پیمرا کو پرویز مشرف کی تقاریر نشر کرنے سے روکے۔واضح رہے کہ انتخابی اصلاحات ایکٹ2017 کے خلاف دائر درخواستوں پر سپریم کورٹ کے فیصلے کے بعد سابق وزیراعظم نواز شریف پارٹی صدارت کیلئے بھی نا اہل ہو چکے ہیں ۔ سپریم کورٹ کے اسی فیصلے کو بنیاد بناتے ہوئے پرویز مشرف کے خلاف بھی لاہور ہائیکورٹ میں نااہلی کی درخواست دائر کی گئی ہے۔ خیال رہے کہ سپریم کورٹ کے انتخابی اصلاحات ایکٹ 2017سے متعلق آج 51صفحات پر مشتمل تفصیلی فیصلہ بھی جاری کر دیا گیا ہے جو کہ چیف جسٹس آف پاکستان نے خود تحریر کیا ہے۔