لاہور ( این این آئی) لاہور ہائیکورٹ نے ایس ایچ او تھانہ ماڈل ٹاؤن گوجرانوالہ کو غیر ملکی خاتون کی بیٹیوں کو بازیاب کروا کر 23 فروری کو پیش کرنے کا حکم دے دیا۔ گزشتہ روز لاہور ہائیکورٹ کے مسٹر جسٹس سردار شمیم احمد خان نے سماعت کی ۔ درخواست گزار لوتھینین خاتون لسکاز لیٹ کے وکیل نے بتایا کہ درخواست گزار نے مذہب تبدیل کر کے پاکستانی شہری ڈاکٹر جمشید سے شادی کی
تاہم شوہر 2011ء میں 9 سالہ مریم، 11 سالہ عائشہ اور 13 سالہ آمنہ کو دبئی سے لیکر پاکستان فرار ہوگیا اور طلاق نامہ بھجوا دیا ۔ معزز عدالت سے استدعا ہے کہ تینوں بیٹیوں کو بازیاب کروا کر ماں کے حوالے کرنے کا حکم دیا جائے۔ جس پر فاضل عدالت نے ایس ایچ او تھانہ ماڈل ٹاؤن گوجرانوالہ کو 23 فروری کو بیٹیوں کو بازیاب کر کے عدالت میں پیش کرنے کا حکم دے دیا۔
