لاہور (این این آئی ) پیر آف سیال پیر حمید الدین سیالوی کو برین ہیمرج کے باعث لاہور کے نجی ہسپتال میں داخل کرا دیا گیا ،فالج کے باعث ان کی دائیں سائیڈ متاثر ہوئی ہے ،اطلاع ملنے پر مریدین کی بڑی ہسپتال پہنچ گئی جبکہ نجی ٹی وی نے ترجمان کے حوالے سے کہا ہے کہ ختم نبوت کے معاملے پر حکومت کی وعدہ خلافی کے باعث پیر حمید الدین سیالوی پریشان تھے اور یہی ان کی علالت کی وجہ بنی ۔ بتایا گیا ہے کہ پیر حمید الدین سیالوی

ایک کانفرنس میں شرکت کے لئے شرکت کے لیے چنیوٹ جارہے تھے کہ راستے میں ان کی طبیعت خراب ہونے پر انہیں سرگودھا کے ڈسٹرکٹ ہسپتال میں لیجایا گیا جہاں سے انہیں ابتدائی طبی امداد دینے کے بعد لاہور بھیج دیا گیا ۔ پیر حمید الدین سیالوی کو لاہور کے نجی ہسپتال داخل کرا دیا گیا جہاں انہیں پہلے مرحلے میں ایمر جنسی میں طبی امداد دی گی جس کے بعد ان کا سٹی سکین کر کے آئی سی یو میں منتقل کر دیا گیا ۔ان کے ساتھ موجود رہنماؤں نے ڈاکٹرز کے حوالے سے کہا ہے کہ پیر حمید الدین سیالوی کو برین ہیمرج ہوا ہے اور اس کی وجہ سے ان کی دائیں سائیڈ متاثر ہوئی ہے تاہم یہ نہیں بتایا گیا کہ انہیں مزید کتنے روز ہسپتال میں رکھا جائے گا۔ پیر حمید الدین سیالوی کی علالت کی اطلاع ملتے ہی مریدین کی ایک بڑی تعداد بھی ہسپتال پہنچ گئی جو ان کی جلد صحتیابی کے لئے دعائیں کرتے رہے۔ نجی ٹی وی نے پیر حمید الدین سیالوی کے ترجمان خدا بخش ٹوانہ کے حوالے سے کہا ہے کہ پیر صاحب شہبا ز شریف کو اپنا بہت اچھا دوست سمجھتے تھے اور ختم نبوت کے معاملے پر شہباز شریف نے پیر حمید الدین سیالوی سے وعدے کیے مگر انہیں پورا نہیں کیا گیا ۔پیر حمید الدین سیالوی حکومت کی وعدہ خلافی پر پریشان تھے اور اس بات کا ان کے ذہن پر بہت شدید دباؤ تھا جس کی وجہ سے ان کی طبیعت ناساز ہوئی ۔ترجمان پیر حمید الدین سیالوی نے بتایا کہ پیر حمید الدین سیالوی ہر وقت ختم نبوت کے معاملے پر سوچتے رہتے اور پیر حمید الدین سیالوی نے کبھی بھی ختم نبوت کے معاملے پر سمجھوتہ نہیں کیا۔