اسلام آباد (نیوز ڈیسک) عرب شوہر کی جانب سے اپنی بیوی کو غصے میں بھیجا گیا ایک واٹس ایپ پیغام بے حد مہنگا پڑا۔ تفصیلات کے مطابق عرب اخبار ’الاتحاد‘ کا کہنا ہے کہ دبئی میں رہائش پذیر میاں بیوی کے درمیان تلخ کلامی ہوگئی جس کے نتیجے میں ناراض بیگم اپنے گھر چلی گئی۔ وہ گھر پہنچی تو دیکھا کہ واٹس ایپ پر اس کے شوہر کا پیغام آیا ہوا ہے کہ اس نے اسے طلاق دے دی ہے۔ خاتون کا پارہ مزید چڑھ گیا اور اس نے مقامی عدالت میں طلاق کیلئے درخواست جمع کروادی۔ تاہم پھر رشتہ دار بھی درمیان میں آگئے اور شوہر کا غصہ بھی ٹھنڈا ہوگیا تو اس نے موقف اختیار کیا کہ یہ پیغام اس نے غصے میں بھیجا تھا اور طلاق دینے کا کوئی ارادہ نہیں تاہم بیگم نے یہ موقف قبول کرنے سے انکار کردیا۔ اس کا کہنا ہے کہ طلاق تو ہوچکی اب بس عدالت کے ذریعے اسے قانونی شکل دینی ہے۔