اسلام آباد (نیوز ڈیسک) سری لنکا نے پاکستانی شہریوں کے لیے ویزا فیس ختم کرنے کا اعلان کرتے ہوئے ایک اہم سہولت متعارف کرا دی ہے،

جس کا مقصد دونوں ممالک کے درمیان سیاحت، تجارت اور عوامی روابط کو مزید مضبوط بنانا ہے۔میڈیا رپورٹس کے مطابق پاکستان میں تعینات سری لنکا کے قونصل جنرل سنجیوا پاتھووالا نے بتایا کہ پاکستانی درخواست گزاروں کی آن لائن ویزا درخواستوں پر عموماً 48 گھنٹوں کے اندر فیصلہ کر لیا جاتا ہے، تاکہ انہیں جلد از جلد سفری سہولت فراہم کی جا سکے۔انہوں نے کہا کہ یہ اقدام پاکستان اور سری لنکا کے باہمی تعلقات کو وسعت دینے کی حکومتی حکمت عملی کا حصہ ہے۔ ان کے مطابق نئی ویزا پالیسی نہ صرف سیاحتی سرگرمیوں میں اضافہ کرے گی بلکہ تعلیم، تجارت، سرمایہ کاری اور دفاع سمیت مختلف شعبوں میں تعاون کے نئے مواقع بھی پیدا کرے گی۔قونصل جنرل کا کہنا تھا کہ ویزا فیس کے خاتمے سے کاروباری شخصیات، طلبہ اور سیاحوں کے لیے دونوں ممالک کے درمیان سفر پہلے سے زیادہ آسان اور سہل ہو جائے گا، جس سے عوامی سطح پر روابط بھی مضبوط ہوں گے۔

انہوں نے مزید بتایا کہ سری لنکا پاکستانی سیاحوں کو اپنی جانب متوجہ کرنے کے لیے مختلف اقدامات کر رہا ہے۔ خوبصورت ساحلی مقامات، تاریخی ورثہ، قدرتی حسن، جنگلی حیات کے پارکس اور سرسبز پہاڑی علاقے اس ملک کو سیاحت کے لیے ایک منفرد منزل بناتے ہیں۔ماہرین کا کہنا ہے کہ نئی ویزا سہولت کے بعد پاکستانی شہریوں کے لیے سری لنکا کا سفر نسبتاً کم خرچ اور زیادہ آسان ہوگا، جس سے سیاحت، تعلیمی تبادلوں اور کاروباری سرگرمیوں میں بھی نمایاں اضافہ متوقع ہے۔