لاہور( این این آئی)سپریم کورٹ کے حکم پر مختلف مقامات پر سکیورٹی کے نام پرکھڑی کی گئی رکاوٹیں ہٹائے جانے کے بعد جاتی امراء ، وزیر اعلیٰ کی رہائشگاہ اور کیمپ آفس کی سیف سٹی کیمروں کے ذریعے براہ راست نگرانی شروع کر دی گئی ۔ نجی ٹی وی کے مطابق سابق وزیر اعظم نواز شریف کی رہائشگاہ جاتی امراء کی سکیورٹی کے لئے 60، وزیر اعلیٰ کیمپ آفس کیلئے 42جبکہ وزیر اعلیٰ ہاؤس کی
سکیورٹی کے لئے 17کیمرے نصب کر دئیے گئے ہیں۔ بتایا گیا ہے کہ یہ کیمرے سیف سٹی پراجیکٹ کے تحت لگائے گئے ہیں جن کی کمانڈ اینڈ کنٹرول سنٹر سے براہ راست نگرانی کی جارہی ہے۔ یاد رہے کہ سپریم کورٹ نے جاتی امراء، گورنر ہاؤس ،وزیر اعلیٰ کی رہائشگاہ اور دفتر سمیت مختلف مقامات پر سکیورٹی کے نام پر رکھی گئی رکاوٹیں اور سکیورٹی بیرئیر ہٹانے کا حکم دیا تھا۔
