اسلام آباد (مانیٹرنگ ڈیسک) تحریک انصاف کے رہنما فیصل واوڈا نے ایک نجی ٹی وی چینل کے پروگرام میں گفتگو کرتے ہوئے کہا کہ میں پہلے بھی کہہ چکا تھا عامر خان ایم کیو ایم پاکستان کو لیڈ کریں گے، آج جب کارکنوں نے عامر خان کا ساتھ دیا تو یہ بات ثابت ہوگئی۔ انہوں

نے فاروق ستار پر الزام لگاتے ہوئے کہا کہ فاروق ستار سینیٹ کی 4 نشستیں فروخت کر چکے ہیں، انہوں نے ایک ووٹ کی قیمت ساڑھے تین کروڑ لگائی ہے۔ فیصل واوڈا نے کہا کہ یہ پوری کہانی کامران ٹیسوری پر نہیں ہے بلکہ یہ سیاسی جوڑ توڑ اور نشستیں بیچنے کا عمل تھا۔ انہوں نے کہا کہ فاروق ستار نے پارٹی کا آئین رابطہ کمیٹی اور قوم سے پوچھے بغیر تبدیل کیا اور اس میں ساری پاور اپنے ہاتھ میں کر لی۔ فیصل واوڈا نے گفتگو کرتے ہوئے کہا کہ جب یہ ٹارگٹ کلر تھے اور بھتہ خور تھے، اس وقت بھی میں نے ان کے خلاف آواز اٹھائی، انہوں نے کہا کہ ایم کیو ایم ٹکڑے ٹکڑے ہوتے ہوتے یہ ہمارے لیے کھلونے بن گئے ہیں، فیصل واوڈا نے کہا کہ میں نے اپنی پارٹی سے کہا ہے کہ ہم ایم کیو ایم کے مزید ٹکڑے کریں گے تاکہ اس کھلونے سے ہم کھیل سکیں۔ انہوں نے مزید کہا کہ عامر خان اس بات سے آگاہ ہیں کہ فاروق ستار نے پیپلز پارٹی کو سینٹ کی نشستیں کوڑیوں کے دام دیں، انہوں نے کہا کہ ان کے چھ ایم پی ایز تو ایسی قیمت لے رہے ہیں کہ انہیں کوئی بھی چلتا ہوا آدمی خرید سکتا ہے۔  تحریک انصاف کے رہنما فیصل واوڈا نے کہا کہ عامر خان ایم کیو ایم پاکستان کو لیڈ کریں گے