پشاور (این این آئی) جمعیت علما اسلام (س) کے سربراہ مولانا سمیع الحق نے کہا ہے کہ سینیٹ انتخابات میں 4جماعتوں کی حمایت حاصل ہے اور ان ہی کا متفقہ امیدوار ہوں،ایم ایم اے میں واپسی گناہ ہے، مذہبی جماعتوں کے اتحاد میں جانے کے بجائے گھر میں بیٹھنا بہتر سمجھتا ہوں ۔ ہفتہ کو پشاور میں میڈیا سے گفتگو میں مولانا سمیع الحق نے کہا کہ تحریک انصاف میں شامل نہیں ہوئے ہیں

ان کے ساتھ سیٹ ایڈجسٹمنٹ ہوئی ہے۔ انہوں نے کہا کہ میری سینیٹر شپ کیلئے صرف خیبربازار سے تصویریں کھنچوانے کے 36روپے خرچ ہوئے ہیں۔ انہوں نے کہا کہ میں4مرتبہ یعنی 18 سال تک سینیٹر رہا ہوں اور بغیر کوئی خرچ ، وسائل اور ذرائع کے عوام کی خدمت انجام دی ہے۔ انہوں نے کہا کہ مجھے ہر بار جماعتی وابستگی سے بالاتر ہوکر لوگوں نے ووٹ دیئے ہیں،اب بھی تحریک انصاف سمیت تمام جماعتوں سے رابطے ہیں۔انہوں نے کہا کہ فی الحال سینیٹ میں جنرل اور ٹیکنو کریٹ کی سیٹ پر کاغذات نامزدگی داخل کئے ہیں۔کسی ایک سیٹ پر کاغذات نامزدگی واپس لے لونگا۔ انہوں نے کہا کہ میرے تجویز اور تائید کندگان 4 مختلف جماعتوں سے ہیں۔انہوں نے کہا کہ مجھے (ن) لیگ ، پی ٹی آئی ، جے یو آئی (ف) اور قومی وطن پارٹی کی حمایت حاصل ہے۔متحدہ مجلس عمل میں شمولیت کے حوالے سے انہوں نے کہا کہ میں ایم ایم اے میں واپسی کو گناہ سمجھتا ہوں۔اسلام کے نام پر ہم قوم کو دوبارہ دھوکہ نہیں دے سکتے ۔ انہوں نے کہا کہ مذہبی جماعتوں کے اتحاد میں جانے کے بجائے میں گھر میں بیٹھنا بہتر سمجھتا ہوں ۔