اسلام آباد (مانیٹرنگ ڈیسک)پاکستانی نژاد سائوتھ افریقین سپن بائولر عمران طاہر سے تو ہر کوئی واقف ہے ۔ عمران طاہر سے متعلق انکشاف ہوا ہے کہ انہوں نے کرکٹ نہیں بلکہ اپنا پیار پانے کیلئے پاکستان چھوڑ کر جنوبی افریقہ میں سکونت اختیار کر لی تھی۔ ان کی محبت کی داستان کچھ ایسے ہے کہ عمران طاہر کو ان سے پہلی نظر میں ہی پیار ہو گیا تو کئی سالوں بعد شادی کی پیشکش پر

انہوں نے صاف الفاظ میں یہ کہہ دیا کہ وہ کسی صورت بھی جنوبی افریقہ نہیں چھوڑیں گی جس پر عمران طاہر خود ہی جنوبی افریقہ منتقل ہو گئے۔عمران طاہر 1990ءکی دہائی میں پاکستان انڈر 19 ٹیم کی نمائندگی کر رہے تھے کہ 1998ءکا انڈر 19 ورلڈکپ کھیلنے کیلئے پاکستانی ٹیم جنوبی افریقہ گئی جہاں انہوں نے پہلی مرتبہ ”سمیہ دلدار“ کو دیکھا جو ماڈلنگ کے شعبے سے وابستہ تھیں۔ انہوں نے سمیہ کیساتھ کافی عرصہ گزارنے کے بعد جب شادی کی پیشکش کی تو انہوں نے ایک شرط پر ہاں کر دی کہ وہ جنوبی افریقہ نہیں چھوڑیں گی جس پر عمران طاہر نے 2006ءمیں پاکستان چھوڑ کر جنوبی افریقہ میں سکونت اختیار کر لی۔عمران طاہر نے جنوبی افریقہ میں کرکٹ کھیلنا جاری رکھا اور 5 سال ڈومیسٹک کرکٹ کھیلنے کے بعد انہیں 2011ءمیں جنوبی افریقہ کی نیشنل ٹیم میں نمائندگی مل گئی جس کے بعد انہوں نے پیچھے مڑ کر نہیں دیکھا اور کامیابیوں کا لامتناہی سلسلہ شروع ہو گیا جو اب تک جاری ہے۔عمران اور سمیہ کا ایک بیٹا بھی ہے جس کا نام جبران طاہر ہے۔