اسلام آباد (این این آئی) امریکی نائب معاون وزیر خارجہ برائے جنوبی و وسط ایشیائی امور ایلس ویلز نے دہشت گردی کیخلاف جنگ میں پاکستان کی نمایاں قربانیوں کا اعتراف کرتے ہوئے کہا ہے کہ پاکستان کیساتھ تعلقات کو نئی جہت کی جانب گامزن کرنے کی ضرورت ہے۔ منگل کو امریکی سفارتخانہ کی جانب سے جاری بیان کے مطابق امریکی نائب معاون وزیر خارجہ ایلس ویلز نے15 اور 16 جنوری کو اسلام آباد کا دورہ کیا۔ ایلس ویلز نے

پاکستانی سرکاری حکام سے ملاقاتوں کے دوران پاکستان کیساتھ تعلقات کو ایک نئی جہت کی جانب گامزن کرنے کی ضرورت پر زور دیا جو مستحکم اور خوشحال خطہ کی منزل کے حصول کے باہمی مفاد پر مبنی ہوں۔ نائب معاون وزیر خارجہ ایلس ویلز نے دہشت گردی کیخلاف جنگ میں پاکستان کی نمایاں قربانیوں کا اعتراف کرتے ہوئے کہا کہ جنوبی ایشیاء کے بارے میں امریکی حکمت عملی ایک مستحکم اور پرامن افغانستان کے قیام، جنوبی ایشیاء میں داعش کو شکست دینے اور پاکستان اور امریکہ کیلئے مشترکہ خطرہ بنے ہوئے دہشت گردوں کو شکست دینے کے عزم کی عکاسی کرتی ہے۔