سکھر(مانیٹرنگ ڈیسک) جمعیت علماء اسلام کے مرکزی امیر مولانا فضل الرحمن نے واقعہ قصور اور ملک میں بڑھتے ہوئے سیاسی انتشار پر گہری تشویش کا اظہار کرتے ہوئے کہا ہے کہ قصورسانحہ انتہائی قابل مذمت اور پوری قوم کیلئے لمحہ فکریہ ہے مگر افسوس کے کچھ مفاد پرست اور سازشی لوگ اس پر بھی سیاست کرنے پر تلے ہوئے ہیں اور ملک میں انتشار پھیلا نے کی کوشش کر رہے ہیں ان خیالا ت کا اظہار انہوں نے سکھر میں
جے یو آئی مرکزی میڈیا سیل کے رکن آغا سید محمد ایوب شاہ ، مفتی سعو د افضل ہالیجوی ، مولانا عبدالحق مہر ، مولانا عبید اللہ بھٹو ابن آزاد و دیگر رہنماؤں سے گفتگو کے دوران کیا سکھر میں جے یو آئی سندھ کے ایڈیشنل انفارمیشن سیکریٹری مولانا عبدالحق مہر کی جانب سے جاری کردہ بیان میں مولانا فضل الرحمن کا مزید کہنا تھا کہ عمران قادری حکومت دشمنی میں تمام حدود پھلانگ گئے ہیں وہ نواز شریف کے پیچھے پڑے ہوئے تھے تو ہر چیز اور ہر واقعہ پر سیاست کرتے ہوئے حالات خراب کر رہے تھے اور اب شہباز شریف حکومت کے خلاف ایک کرمنل واقعہ کی آڑ میں آگ بھڑکا رہے ہیں انہوں نے کہا کہ جب وزیر اعلیٰ پنجاب نے اس واقعہ کا نوٹس لیتے ہوئے کاروائی کا اعلان کیا ہے تو اس پر سیاست کرنا کیا معنیٰ رکھتا ہے عمران قادری اس واقعہ پر احتجاج کا اعلان کر کے جلتی پر تیل کا کام کر رہے ہیں یہ سیاسی جماعتوں کا نہیں بلکہ سازشی لوگوں کا کام ہے پی پی قیادت سنجیدگی کا مظاہر ہ کرتے ہوئے مثبت کردار ادا کرے انہوں نے کہا کہ پنجاب میں جو ہو رہا ہے وہ احتجاج نہیں بلکہ انتشار ہے یہ روایت چل پڑی تو یہ ملک چل نہیں سکے گا ان واقعات سے میاں نواز شریف کے ان بیانات کی کہ ہمارے خلاف سازش ہو رہی ہے کی تائید ہوتی ہے کہ وہ ایک بڑی سیاسی جماعت کے سربراہ ہیں ان کے شکایت کا ازالہ ہونا چاہئے ان کا مطمئن کیا جانا چاہئے ۔
