نیویارک(سی پی پی) اقوام متحدہ میں امریکہ کی مستقل سفیر نکی ہیلی نے پاکستان کی امداد روکنے کی تصدیق کرتے ہوئے کہا ہے کہ اسلام آباد دہشت گردوں پناہ دے اور ڈبل گیم کھیل رہا ہے ، پاکستان اکثر ہمارے ساتھ کام کرتا ہے اور افغانستان میں ہماری فوجوں پر حملوں کیلئے دہشت گرد بھی بھیجتا ہے ۔نیویارک میں صحافیوں سے بات چیت کرتے ہوئے امریکی سفیر نے اسلام آباد پر دہشت گردوں کو پناہ دینے اور ڈبل گیم
کھیلنے کا الزام عائد کیا اور کہا کہ امریکی انتظامیہ 225 ملین امریکی ڈالرز کی پاکستان کو امداد روک رہی ہے۔ اس کی واضح وجوہات ہیں کہ پاکستان نے کئی برسوں سے ڈبل گیم کھیلی ہے۔انھوں نے کہا کہ وہ اکثر ہمارے ساتھ کام کرتے ہیں اور افغانستان میں ہماری فوجوں پر حملے کے لیے دہشت گرد بھی بھیجتے ہیں، یہ کھیل اس انتظامیہ کے لیے قابل قبول نہیں ہے۔ ہم دہشت گردی کے خلاف لڑائی میں پاکستان سے کہیں زیادہ
تعاون کی توقع رکھتے ہیں۔دوسری جانب وائٹ ہاوس کا کہنا ہے کہ وہ دہشت گردی کے خلاف جنگ میں پاکستان کو مزید اقدامات کرتے دیکھنا چاہتے ہیں اور آئندہ 24 سے 48 گھنٹوں میں پاکستان کے حوالے سے مزید تفصیلات فراہم کی جائیں گی۔خیال رہے کہ نکی ہیلی کے اس بیان سے قبل امریکی صدر ڈونلڈ ٹرمپ نے پاکستان پر الزام عائد
کیا تھا کہ گذشتہ ڈیڑھ دہائی میں اربوں ڈالر کی امداد لینے کے باوجود پاکستان نے امریکہ کو سوائے جھوٹ اور دھوکے کے کچھ نہیں دیا ہے۔ڈونلڈ ٹرمپ کے اس بیان کے بعد پاکستان کے مختلف شہروں میں احتجاجی مظاہرے بھی منعقد کیے گئے ہیں۔جبکہ پاکستان نے اپنے ردعمل میں کہا ہے امریکہ اور پاکستان کو تعاون اور مل کر کام کرنا ہوگا کیونکہ منفی بیان بازی سے اہداف کو حاصل نہیں کیا جا سکتا۔
