ڈھاکہ (نیوز ڈیسک) بنگلہ دیش کے اوپننگ بلے باز صومیا سرکار نے پاکستان کے خلاف آخری ون ڈے میں کیریئر کی پہلی سنچری داغ دی، اس کے علاوہ سرکار نے اننگز میں زیادہ چھکے لگانے والے دوسرے بنگلہ دیشی بلے باز ہونے کا اعزاز بھی حاصل کرلیا۔ ڈھاکہ میں کھیلے گئے سیریز کے تیسرے اور آخری ایک روزہ میچ میں سرکار نے پاکستانی باﺅلرز کا ڈٹ کر مقابلہ کیا اور شاندارسنچری مکمل کی، یہ ان کے کیریئر کی پہلی سنچری تھی۔ انہوں نے 127 رنز کی ناقابل شکست اننگز کھیل کر اپنی ٹیم کی فتح میں اہم کردار ادا کیا، انہوں نے اننگز میں 6 چھکے بھی لگائے اور اس کے ساتھ ہی وہ ایک اننگز میں زیادہ چھکے لگانے والے دوسرے بنگلہ دیشی بیٹسمین بھی بن گئے۔ بنگلہ دیش کی جانب سے اننگز میں زیادہ چھکے لگانے کا اعزاز تمیم اقبال کو حاصل ہے، انہوں نے 2010ءمیں زمبابوے کے خلاف میچ میں 7 چھکے لگائے تھے۔