اسلام آباد(مانیٹرنگ ڈیسک)پاکستان میں موٹاپا ایک وبا کی طرف پھیلتا جا رہا ہے اور موٹاپے کا شکار افراد کی زندگی اس کے باعث اجیرن بن جاتی ہے ۔ دنیا میں ایسے بہت سے افراد ہیں جنہوں نے نہ صرف موٹاپے کو شکست

دی بلکہ اپنے عزم اور ہمت سے ناممکن کو ممکن کر دکھایا انہی میں ایک نوجوان لاہور سکول آف اکنامکس میں ایم بی اے کے طالبعلم علی بٹ بھی ہیں۔ علی بٹ ایک وقت میں 148کلو گرام کے بھاری بھرکم نوجوان تھے اور پھر انہوں نے اس موٹاپے سے نجات پانے کا عزم کیا اور اپنے خوراک اور سخت ورزش سے اپنے وزن میں 66کلو گرام کی حیرت انگیز کمی لانے میں کامیاب ہو گئے ۔ علی بٹ کا کہنا ہے کہ وزن میں کمی کا خواب صرف خوراک کم کر کے پورا نہیں کیا جا سکتا بلکہ آپ کو یہ بھی دیکھنا پڑتا ہے کہ آپ کس قسم کی خوراک کھارہے ہیں۔ وہ کہتے ہیں کہ انہوں نے اپنی زیادہ توجہ پروٹین والی غذاؤں اور انڈوں پر رکھی اور باقاعدگی سے سخت ورزش بھی کرتے رہے۔علی بٹ نے سوشل میڈیا پر اپنی تصاویر شیئر کی ہیں جن میں دیکھا جا سکتا ہے کہ ماضی میں وہ ایک انتہائی موٹے نوجوان نظر آتے تھے تاہم خوراک اور سخت ورزش نے انہیں بعد میں ایک سمارٹ اور خوبصورت جسم کے مالک نوجوان میں تبدیل کر دیا ہے۔