لاہور(مانیٹرنگ ڈیسک) چیئرمین متروکہ وقف املاک بورڈ محمد صدیق الفاروق نے کہا ہے کہ دوران ملازمت وفات پانے والے ملازمین کے اہل خانہ کو 24گھنٹے کے اندر 15لاکھ روپے دیے جائیں گے جو کہ دیگر مراعات کے علاوہ ہوں گے جبکہ ملازمین کی فلاح بہبود کے لیے بورڈ کی منظوری سے 50لاکھ مالیت کا فنڈ قائم کیا جائے گا ۔یہ اعلان انہوں نے اپنے دفتر میں افسران و ملازمین کی کھلی کچہری سے خطاب کرتے ہوئے کیا

اس موقع پر سیکرٹری بورڈ میاں عبدالقدیر ،ایڈیشنل سیکرٹری شرائنز محمد طارق ،سٹاف آفیسر ظفر اقبال اعوان،پی آر او عامر حسین ہاشمی ،عمران خان ،فراز عباس،ایڈمنسٹریٹر لاہور تنویر حسین ،عبدالوحید خان سمیت ملازمین کی بڑی تعداداموجود تھی ۔انہوں نے کہا کہ یہ فنڈ بورڈ کی منظوری کے بعد قائم کیا جائے گا اوراس مقصد کے لیے متفقہ طور پر ہر ملازم کی تنخواہ میں سے ماہانہ 2 سور وپے اس فنڈ میں جمع کیے جائیں گے جبکہ فنڈ میں جمع ہونے والی رقم کو سے سرمایہ کاری کی جا ئے گی اور اسکا منافع بھی ملازمین کو ہو گا ۔انہوں نے کہا کہ میں ٹرسٹ بورڈ کی ترقی اور ملازمین کی فلاح و بہبود کے لیے دن رات کوشاں ہوں اس سلسلہ میں میں نے وزیر اعظم پاکستان سے درخواست کی ہے کہ متروکہ وقف املاک بورڈ کی ترقی کے لیے خاص طور پر اقدامات اٹھائیں تاکہ میں پاکستان میں اقلیتوں کی عبادت گاہوں اور املاک کی حفاظت بہتر انداز میں کر سکوں اور ادارہ کو مزید مستحکم بنایا جاسکے ۔انہوں نے مزید کہا کہ ختم نبوت ہمارے ایمان اوردین اسلام کا اہم جز ہے جس پر کوئی سمجھوتہ ممکن ہی نہیں۔انہوں نے کہا کو اللہ اور اسکا رسولؐ دین اسلام کے محافظ ہیں اللہ معاف کرنے اور اپنی اصلاح کرنے والوں کو پسند کرتا ہے ۔انکا کہنا تھا کہ ملازمین کے مسائل جلد از جلد حل کرنے کے لیے اقدامات کیے جا رہے ہیں۔انہوں نے وفات پانے والے سیکورٹی گارڈ نیاز اور دیگر مرحوم ملازمین کے فاتحہ اور ملک کی ترقی و خوشحالی اور قیام امن کے لیے خصوصی دعا کی۔