اسلام آباد (مانیٹرنگ ڈیسک) عمران خان نے کہا کہ وزیر اعظم اور انکے وزیروں نے انتہائی حساس معاملہ بگاڑ کر ملک کو سنگین بحران کی دلدل میں دھکیل دیا۔ عمران خان نے کہاکہ آپریشن کے نام پر ایسی چنگاری سلگائی گئی جس نے پورے ملک کواپنی لپیٹ میں لیا۔ عمران خان نے کہاکہ ماردھاڑ اور املاک کی تباہی کا سلسلہ پورے ملک میں پھیل گیا۔ عمران خان نے کہا کہ حکومت نے راجہ ظفرالحق کمیٹی کی رپورٹ جاری کرنے اور ذمہ داروں

کیخلاف کارروائی کا وعدہ کیا تھا۔ پاکستان تحریک انصاف کے سربراہ عمران خان نے مطالبہ کیا ہے کہ پاکستان کو انتہائی خطرناک صورتحال میں دھکیلنے پر وزیر اعظم شاہد خاقان عباسی سے فوری مستعفی ہو جائیں ٗ وزیر داخلہ احسن اقبال اور وزیر قانون بھی عہدے چھوڑدیں۔ اتوار کو پاکستان تحریک انصاف کے میڈیا سیل کی جانب سے جاری بیان میں عمران خان نے کہاکہ وزیرقانون کو بہت پہلے ذمہ داری قبول کرتے ہوئے مستعفی ہوجانا چاہئے تھا۔ انہوں نے کہاکہ وقت آگیا ہے کہ شریف خاندان کا کٹھ پتلی وزیر اعظم اپنے وزیروں سمیت گھرجائے۔ عمران خان نے کہا کہ اس حوالے سے وزیر اعلیٰ پنجاب کا مطالبہ بھی ریکارڈ پر موجود ہے ۔عمران خان نے کہا کہ ذمہ داروں کیخلاف کارروائی نہ کرکے حکومت نے غلطی پر پردہ ڈالنے کے تاثر کو تقویت دی۔ عمران خان نے کہا کہ یہ سوال پیدا ہواکہ ڈان لیکس کیطرح کیا ختم نبوت جیسے حساس ترین معاملے سے بھی جان بوجھ کر چھیڑ چھاڑ کی گئی۔ چیئر مین پی ٹی آئی نے کہاکہ موجودہ حکومت کسی بھی قیمت پر شریفوں کی کرپشن بچانے پر پوری قوت صرف کئے ہوئے ہے۔ عمران خان نے کہا کہ جمہوریت کا خون ہو یا ملک میں عدم استحکام, حکومت ہر قیمت پر شریفوں کی کرپشن بچانا چاہتی ہے ۔انہوں نے کہاکہ حکومت کو اسکی اجازت نہیں دی جاسکتی ۔انہوں نے کہاکہ ملک میں امن کی بحالی اور جمہوریت کے تحفظ کیلئے وزیراعظم وزیر داخلہ سمیت مستعفی ہوں۔ انہوں نے کہاکہ ملک میں قبل ازانتخاب کروائے جائیں۔