اسلام آباد (مانیٹرنگ ڈیسک) اگر انسانی آبادی اسی طرح بڑھتی رہتی تو توانائی کے استعمال کی شرح سے اگلے 600 برسوں کے اندر زمین آگ کا گولہ بن جائے گی۔ تفصیلات کے مطابق اس بات کا انکشاف معروف سائنسدان اسٹیفن ہاکنگ نے پیشگوئی کرتے ہوئے کیا کہ دنیا کی بڑھتی آبادی اتنی توانائی کا استعمال کرنے لگے گی کہ کہ ہماری دنیا آگ کے گولے کی صورت اختیار کر جائے گی۔ بیجنگ میں جاری ایک کانفرنس سے معروف سائنس دان نے

وڈیو خطاب کے دوران کہا کہ اگر انسانی آبادی اسی رفتار سے بڑھتی رہی تو توانائی کے استعمال کی شرح اگلے 600 برسوں کے اندر ہماری زمین کو آگ کا گولہ بنا دے گی۔ معروف سائنسدان نے کہا کہ انسانوں کو اگلے دس لاکھ برسوں تک اپنی نسل کو برقرار رکھنا ہے تو انہیں وہاں جانا ہوگا جہاں کوئی بھی پہلے نہیں جا سکا۔ انہوں نے مزید کہا کہ بڑھتی آبادی اور اس کے لیے توانائی کی طلب میں اضافہ ہماری دنیا کے خوفناک اختتام کی وجہ بن سکتا ہے اور یہ زمین اتنی گرم ہوجائے گی کہ یہاں رہنا ناممکن ہوجائے گا۔ انہوں نے فلم سیریز سٹار ٹریک کا حوالہ دیتے ہوئے کہا کہ انسانیت کو کائنات میں کہیں اور ٹھکانہ ڈھونڈ لینا چاہیے۔ معروف سائنسدان نے بریک تھرو اسٹارز ہاٹ نامی دس کروڑ ڈالرز کے انجنیئرنگ پروگرام کے حوالے سے پوچھے گئے سوالات کے جواب بھی دیے جس میں معروف سائنسدان کے ساتھ فیس بک کے بانی مارک زکربرگ بھی شامل ہیں۔ انہوں نے کہا کہ اس پروگرام کا مقصد خلائی سفر کے لیے ایسا نظام تیار کرنا ہے کہ ایک گھنٹے سے بھی کم وقت میں مریخ تک پہنچا جا سکے یا چند دنوں میں پلوٹو پر قدم رکھا جا سکے۔ انہوں نے کہا کہ اس پروگرام میں کامیابی کے بعد ہم ایک ہفتے میں Voyager کو پیچھے چھوڑ دیں گے جبکہ الفا سینچوری تک صرف بیس سالوں میں پہنچا جا سکے گا۔ معروف سائنسدان نے کہا کہ امید ہے اگر سب کچھ ٹھیک رہا تو اس صدی کے وسط تک ہم کسی ایسے سیارے کی پہلی تصویر لینے میں کامیاب ہوجائیں گے جہاں زندگی گزاری جا سکتی ہو۔