لاہور ( این این آئی) پاکستان پیپلز پارٹی نے کہا ہے کہ (ن) لیگ کو کسی صورت جمہوری نظام کی بساط لپیٹنے نہیں دی جائے گی اور نہ انتخابات میں تاخیر ہونے دیں گے ،مردم شماری کے تمام مراحل حتمی فیصلہ کرنے کا آئینی فورم مشترکہ مفادات کونسل ہی ہے،
(ن) لیگ والوں کے دل میں کیا چور ہے جو وہاں آنے سے کترا رہے ہیں۔پیپلز پارٹی کے مرکزی سیکرٹری اطلاعات چوہدری منظور نے وفاقی وزیر خواجہ سعد رفیق اور دیگر وزراء کے بیانات پر اپنے ردعمل کا اظہار کرتے ہوئے کہا کہ (ن) لیگ کے لئے اتنا ہی کہہ سکتے ہیں کہ چور چوری سے جائے ہیرا پھیری سے نہ جائے،(ن) لیگ جمہوری اور آئینی اداروں کو نظر انداز کرنے کے نتائج بھگت رہی ہے۔’’مدبر وزرا‘‘بتائیں کہ حلقہ بندیوں کا معاملہ سی سی آئی میں لے جانے کا مطالبہ کس طرح غیرجمہوری ہے،مرم شماری کا فیصلہ مشترکہ مفادات کی کونسل نے کیا تھااور اب مردم شماری کے تمام مراحل حتمی فیصلہ کرنے کا آئینی فورم بھی مشترکہ مفادات کونسل ہی ہے،(ن) لیگ والوں کے دل میں کیا چور ہے جو سی سی آئی میں آنے سے کترا رہے ہیں۔ انہوں نے کہا کہ حکومت الزامات کے بجائے چیف کمشنر مردم شماری پر اٹھائے گئے سوالات کا جواب دے۔حیرت ہے کہ آئینی اور جمہوری اداروں کو بے توقیر کرنے والے انہی اداروں کی بالادستی کی بات کر رہے ہیں،ضیاء کے سیاسی جا نشین اور مشرف سے معافی مانگ کر بھاگ جانے والوں کا کردار قوم کے سامنے ہے، نواز شریف جس آمر کے سامنے گھٹنے ٹیک کر بھاگا تھا اسی آمر سے جیالوں نے مقابلہ کیا،کہنے کو بہت کچھ ہے لیکن ہم (ن) اور پی ٹی آئی کی طرح سیاست میں گند گھولنے کے قائل نہیں۔ چوہدری منظور نے کہا کہ
نون لیگ جو مرضی ہیلے بہانے کر لے انتخابات میں تاخیر نہیں ہونے دیں گے،یہ جمہوریت ہماری قیادت اور کارکنوں کے جانوں کے نذرانے سے آئی اس پر پہرہ دیں گے اور (ن) لیگ کو کسی صورت جمہوری نظام کی بساط لپیٹنے نہیں دی جائے گی۔
