ملتان (مانیٹرنگ ڈیسک)پولیس نے قندیل بلوچ قتل کیس میں درخواست ضمانت خارج ہونے پر فرار ہونے والے مفتی عبد القوی کو گرفتار کرلیا،مفتی عبدالقوی کی گرفتاری جھنگ جاتے ہوئے ہائی وے پر عمل میں لائی گئی اور انہیں ہائی وے پولیس کی مدد سے گرفتار کیا گیا ۔گزشتہ روز ملتان کے ڈسٹرکٹ اینڈ سیشن عدالت کے جج چوہدری امیر محمد کی عدالت میں قندیل بلوچ قتل کیس کی سماعت ہوئی۔ فریقین کے دلائل مکمل ہونے پر عدالت

نے چند منٹ کے لیے درخواست ضمانت پر فیصلہ محفوظ کیا اور اسی دوران وکلا ء نے مفتی عبدالقوی کو عدالت سے فرار کروا دیا ۔عدالت نے قرار دیا کہ ملزم مفتی عبدالقوی کے خلاف دفعہ 302 اور 109 کے تحت کارروائی ہوگی۔عدالتی احکامات کے بعد پولیس کے سادہ لباس اہلکار مفتی عبدالقوی کی گرفتاری کے لیے ان کے گھر پہنچے تاہم مفتی عبدالقوی کی گرفتاری جھنگ جاتے ہوئے ہائی وے پر عمل میں لائی گئی اور انہیں ہائی وے پولیس کی مدد سے گرفتار کیا گیا ہے۔پولیس حکام کے مطابق مفتی عبدالقوی کو اب ملتان منتقل کیا جائے گا۔