انقرہ(مانیٹرنگ ڈیسک)انقرہ میں متعیّن امریکی سفیر نے کہا ہے کہ ترکی میں ویزا خدمات کی معطلی کے دورانیے کا انحصار دونوں ملکوں کی حکومتوں کے درمیان امریکی سفارت خانے کے زیر حراست ترک عملہ کے معاملے پر بات چیت پر ہے۔میڈیارپورٹس کے مطابق امریکی سفیر جان باس نے ایک تحریری بیان میں کہا کہ ویزا خدمات کی معطلی کے دورانیے کا انحصار ترکی میں ہماری تنصیبات اور اہلکاروں کو تحفظ مہیا کرنے پر
بھی ہے۔انھوں نے واضح کیا کہ یہ ترک شہریوں پر ویزے کی پابندی نہیں ہے۔انھوں نے کہا کہ سفارت خانے کو یہ معلوم نہیں ہوسکا ہے کہ اس کے عملہ کے ایک ترک رکن کو گذشتہ ہفتے کیوں گرفتار کیا گیا تھا اور اس ملازم کے خلاف کیا شواہد موجود ہیں؟واضح رہے کہ واشنگٹن میں ترک سفارت خانے نے بھی امریکی سفارت خانے کے اس اقدام کے ردعمل میں امریکیوں کے لیے ویزا خدمات عارضی طور پر معطل کردی ہیں۔