لاہور ( این این آئی) پاکستان تحریک انصاف کے چیئرمین عمران خان 66برس کے ہو گئے،سالگرہ پر پارٹی رہنماؤں ، دوست احباب اور عزیز و اقارب کی جانب سے مبارکباد کے پیغامات بھیجے گئے ۔عمران خان 5 اکتوبر 1952ء کو لاہور میں پیدا ہوئے، انکے کے والد صاحب کا نام اکرام اللہ خان تھا ۔ عمران خان نے ابتدائی تعلیم لاہور سے حاصل کی اس کے بعد اعلیٰ تعلیم کے لیے برطانیہ چلے گئے،
وہاں رائل گرائمر اسکول میں پڑھا اور پھر آکسفورڈ یونیورسٹی سے ایم اے سیاسیات کیا۔عمران خان نے 1969ء میں فرسٹ کلاس کرکٹ کھیل کر اپنے کرکٹ کیرئیر کا آغاز کیا۔ پاکستانی کرکٹ ٹیم نے 1992 ء میں ان کی قیادت میں کھیلتے ہوئے پانچواں کرکٹ عالمی کپ جیتا، انہوں نے مجموعی طور پر 5 عالمی کرکٹ کپ میں حصہ لیا جو 1975، 1979، 1983، 1987 اور 1992 میں منعقد ہوئے۔عمران خان نے 1992 ء میں عالمی کرکٹ سے ریٹائرڈمنٹ لے کر سماجی کاموں میں حصہ لینا شروع کردیا اور کینسر کے مریضوں کیلئے شوکت خانم میموریل ہسپتال قائم کیا۔عمران خان نے دو شادیاں کیں لیکن بدقسمتی دونوں ہی ناکام رہیں، پہلی شادی 1995ء میں جمائما خان سے کی جبکہ دوسری شادی 2015ء میں ریحام خان سے کی ۔عمران خان نے 1996ء میں سیاسی میدان میں قدم رکھا اور تحریک انصاف کے نام سے سیاسی جماعت قائم کی، جو پاکستان کی تیسری بڑی سیاسی جماعت بن چکی ہے، عمران خان تحریک انصاف کے چیئرمین ہیں۔عمران خان کو سالگرہ کے موقع پر پارٹی رہنماؤں ، کارکنوں، دوست احباب اور عزیزواقارب کی جانب سے نیک خواہشات کے اظہار کے پیغامات بھیجے گئے جبکہ کارکنوں کی جانب سے مختلف علاقوں میں تقریبات منعقد کر کے کیک بھی کاٹے گئے۔
