اسلام آباد(آئی این پی) علامہ اقبال اوپن یونیورسٹی نے سمسٹر خزاں 2017ء کے میٹرک سے پوسٹ گریجویٹ سطح تک کے کسی بھی پروگرام میں داخلوں کے خواہشمند امیدواروں کو داخلہ فارم جمع کرانے کے لئے 10۔اکتوبر تک اجازت دے دی ہے۔تفصیلات کے مطابق داخلوں کے آخری تاریخ ) 28۔ستمبر(کوبینکوں پر رش کی وجہ سے ہزاروں کی تعداد میں داخلوں کے خواہشمند
امیدوار اپنا داخلہ فارم جمع نہیں کراسکے تھے ٗ ان کو داخلہ فارم جمع کرانے کے لئے مناسب وقت دینے کی اشد ضرورت تھی۔ وائس چانسلر ٗ پروفیسر ڈاکٹر شاہد صدیقی نے ایسے تمام افراد کو نہایت معمولی لیٹ فیس چاجز کے داخلہ فارم جمع کرانے کے لئے 10۔اکتوبر تک مہلت کی منظوری دے دی ہے۔ میٹرک پروگرام میں داخلے کے لیٹ فیس چارجز 100۔روپے ٗ ایف اے اور بی اے کے لئے 200۔روپے جبکہ پوسٹ گریجویٹ/بی ایڈ پروگرامز کے لئے 500۔روپے مقرر کئے گئے ہیں۔شعبہ داخلہ کے ڈائریکٹر ٗ سید ضیاء الحسنین کے مطابق ملک کے ہر کونے میں داخلہ فارم کی دستیابی کی سہولت فراہم کرنے کے نتیجے میں رواں سمسٹر میں اب تک داخلہ فارم حاصل کرنے والے طلبہ کی تعداد گزشتہ سمسٹر کی نسبت بہت زیادہ ہے اور پراسپکٹس سیل پوائنٹس پر داخلہ فارم خریدنے والوں کی تعداد میں مسلسل اضافہ ہورہا ہے۔ ڈاکٹر شاہد صدیقی نے کہا کہ فاصلاتی نظام تعلیم کے ذریعہ تعلیمی سلسلہ جاری رکھنے میں طلبہ کی غیر معمولی دلچسپی قابل ذکر ہے۔ انہوں نے کہا کہ یونیورسٹی کے لرننگ نظام میں نئی ٹیکنالوجی کے استعمال اور سٹوڈنٹ سپورٹ نظام میں مزید بہتری لانے کے نتیجے میں طلبہ کا یونیورسٹی پر اعتماد میں اضافہ ہوا ہے۔ داخلوں کے
بارے میں طلبہ و طالبات کی رہنمائی کے لئے یونیورسٹی کے 44۔علاقائی دفاتر میں “خصوصی کائونٹرز” قائم کردئیے گئے ہیں۔
