اسلام آباد(مانیٹرنگ ڈیسک)وزارت داخلہ نے ملی مسلم لیگ کو رجسٹرڈ نہ کرنے کیلئے الیکشن کمیشن کو خط لکھ دیا۔تفصیلات کے مطابق ملی مسلم لیگ کو رجسٹرڈ نہ کرنے کیلئے وزارت داخلہ نے الیکشن کمیشن کو خط

لکھ دیا ہے۔ الیکشن کمیشن میں ملی مسلم لیگ کو رجسٹرڈ کرنے سے متعلق درخواست زیر سماعت ہے جس کیلئے الیکشن کمیشن نے ملی مسلم لیگ کو رجسٹرڈ کرنے کیلئے وزارت داخلہ سے این او سی طلب کیا تھا جس پر وزارت داخلہ نے الیکشن کمیشن کو اس حوالے سے ایک خط میں ملی مسلم لیگ کو رجسٹرڈ نہ کرنے کا کہا ہے۔ خط میں وزارت داخلہ نےالیکشن کمیشن کو بتایا ہے کہ معاملہ سکیورٹی ایجنسیز کے سامنے بھی اٹھایا۔ خط میں کہا گیا ہے کہ دفتر خارجہ اور ایک انٹیلی جنس ایجنسی نے ملی مسلم لیگ کو رجسٹرد نہ کرنے کی سفارش کی ہے۔ مزید کہا گیا ہے کہ ملی مسلم لیگ ، جماعت الدعوۃ ، لشکر طیبہ، فلاح انسانیت فائونڈیشن ایک دوسرے سے جڑی ہیں۔ یہ جماعتیں ایک ہی نظریہ رکھتی ہیں، لشکر طیبہ پر 14جنوری 2002میں پابندی لگائی گئی ہے جبکہ جماعت الدعوۃ اور فلاح انسانیت فائونڈیشن پر 27جنوری 2007میں پاپندی عائد کی گئی ہے۔خط کے متن میں کہا گیا ہے کہ وزارت داخلہ نے یہ فیصلہ وزارت خارجہ اور انٹیلی جنس کی سفارشات پر کیا ہے۔واضح رہے کہ حافظ سعید کی ملی مسلم لیگ حلقہ این اے 120کے ضمنی انتخاب میں حلقہ میں دوسری بڑی جماعت کے طور پر ابھر کر سامنے آئی ہے ۔