اسلام آباد(مانیٹرنگ ڈیسک) پاکستان مسلم لیگ(ن) کے مرکزی رہنما و وزیر مملکت طلال چوہدری نجی ٹی وی چینل کے پروگرام میں گفتگو کرتے ہوئے آپے سے باہر ہو گئے۔ تفصیلات کے مطابق نجی ٹی وی چینل کے پروگرام میں گفتگو کرتے ہوئے طلال چوہدری نے کہا کہ کلثوم نواز اس وقت بیمار ہیں، میاں نواز شریف نے ایک مثال سیٹ کی ہے جس میں انہوں نے شریک حیات کو بیماری میں چھوڑ کر خود کو احتساب کیلئے پیش
کیا۔ جبکہ دوسری طرف ایک آمر پرویز مشرف اپنی والدہ کی بیماری اور اپنے کمر درد کا بہانہ بنا کر باہر ناچ گانا کر رہا ہے۔ اس کی کمر درد بھی ختم ہے اور اللہ تعالیٰ اس کی والدہ کو اور لمبی زندگی دے ، وہ والدہ کا بہانہ بنا کر باہر بیٹھا ہوا ہے اور ناچ گانا کر رہا ہے۔ جیسے کوئی سائیکل چور(بہن کی غلیظ گالی) اور بھینس چور باہر بھاگ جاتا ہے وہ اس طرح باہر بھاگا ہوا ہے۔ طلال چوہدری نے گفتگو کرتے ہوئے کہا کہ 2018ء کا الیکشن ریفرنڈم کے طور پر لڑیں گے، آئندہ الیکشن بجلی اور دہشتگردی پر نہیں نظام کی خرابی دور کرنے کیلئے لڑیں گے، عوام مینڈیٹ دیں گے تو نظام میں خرابیاں ختم کرنے کیلئے آئینی ترامیم یا قانون میں تبدیلیاں کریں گے، نظام عدل کی خرابیوں کی وجہ سے عدلیہ کو بحال کرنے ، جمہوریت کیلئے جدوجہد کرنے والے منتخب وزیراعظم کو بھینٹ چڑھادیا جاتا ہے، ہمارا مقابلہ ایسی سوچ اور ایسے لوگوں سے ہے جو پرویز مشرف کے ریفرنڈم کے پولنگ ایجنٹ تھے، یہ لوگ شارٹ کٹ کے ذریعے اقتدار میں پہنچنا چاہتے ہیں۔طلال چوہدری کاکہنا تھا کہ پارٹی میں توڑپھوڑ اور چوہدری نثار سے متعلق قیاس آرائیاں غلط ثابت ہوگئی ہیں، نواز شریف کے عدالت میں پیش ہونے سے بہت سے لوگ شرمندہ ہوئے، ن لیگ کے قائد نواز شریف ہیں وہی پارٹی کی قیادت کریں گے، 2018ء میں نواز شریف صرف ن لیگ کو نہیں پاکستان کی سیاست کی قیادت کریں گے، مریم نواز
کی اپنے بھائیوں سے الگ قانونی پوزیشن ہے، حسن اور حسین نواز اوورسیز پاکستانی ہیں ان کے پاس بہت سے قانونی و آئینی اختیارات ہیں، نواز شریف بیمار اہلیہ کو چھوڑ کر عدالت میں پیش ہونے پاکستان آئے، ایک آمر اپنی والدہ اور کمر درد کا بہانہ بنا کر باہر ناچ رہا ہے۔
